Ningani zan khan English Premier League khelh chhunzawm a niin Manchester United chuan Wolves laka harsa takin hnehna an chang a, goal sarih zet luhna inkhel hmuhnawmah 4-3 in Wolves an hneh. Inkhel dangah West Ham United leh AFC Bournmouth an inhnehtawk ve thung.
Manchester United hi Wolverhampton Wanderers hmachhawn turin Molineux Stadium-ah an lenglut a, mikhual an nihna mualah bul an tan hle. Inkhel tantirh teah an khingpuite an nawr tlang nghal. Mawi taka Wolves tlar hnung an thiah hnuin Hojlund chuan Rashford ball a pe a, Marcus Rashford hian minute lina lekah fuh zetin a pet goal a, hmahruaina goal a thun. Hma takah goal an thun vangin Erik ten Hag-a team an phur a, an khel tha zui hle ngh nghe.
Goal hmahruai an thun dan ang deuh thoin United hian minute 22-naah an khingpuite an nawr tlang nawn leh a. Rasmus Højlund chuan vanneihthlak ang reng takin goal a thun a, an hmahruaina a tizau. Chawlhlawk hmain Højlund hian a goal thumna a thun zui leh naa offside vangin he goal hi pawm a ni lo thung. Hojlund goal hnihna pawm ni lo mah se United hian si hnih faia hmahruai chungin chawlhlawk an hmang.
Chawlhlawk hnu lamah inkhel a hmuhnawm lehzual a, goal nga ngawt a lut. Mualneitu Wolves hian minute 71-naah penalty an hmu. He penalty hi Pablo Sarabia chuan harsatna tawk lovin a pet goal a, an si phurh a sut then. Goal chhuahin an hmahruaina derthawng mah se Red Devils an buai phah lova, goal dang an thun belh leh thuai, Minute 75-naah Scott McTominay chuan an goal thumna thunin an hmahruaina a tizau nawn leh.
Goal chhuah nawn lehin, si hnih bawkin hnufual mahse Wolves an beidawng lova, huaisen takin an mikhualte an nawr let. Team lian United lakah point hlawhchhuah theih beiseina sang zawk nei turin Max Kilman chuan minute 85-naah an goal hnihna a thun a, an inkar a tizim nawn leh.
Kilman goal thun hian Molineux Stadium-a mipui pungkhawm a fuih phur viau a, nasa takin an team te an au phur. Team thawkrim Wolves tan hian minute 90+5 naah chuan an goal thumna a thun a, an si phurh a sut zo ta nge nge. Tum thun zet hmahruai tawh chungin United an chak zo lo ngei dawn niin a lang hman a, United an hnual hman laiin Wolves erawh phur namen lohin an phurh tawh thung. Wolves phur lutuk hian United tumruhna a chawk tho thar a, hun pek belha goal thun thiam team an nihna an lantir nawn leh sak.
Goal an chhuah hnu lawkah Red Devils hian fuh zetin an khingpuite an nawr tlang a, inringtawk zeta a khalh tlang hnuin Kobbie Mainoo chuan minute 90+7-ah mawi zetin pet kual lut a, hma an hruai nawn lehna goal a thun. Mainoo-a’n an league goal a thun hmasak ber hmangin United in hnehna pawimawh tak an chang a, point thum hlu tak an hmu ta a ni.
Harsa taka point thum an hlawhchhuak Manchester United hian khelh 22 atanga point 35 hmuin hma an sawn hret a, top 4 huang erawh an a hlat rih viau thung. Palinaa awm mek Tottenham nen an inkarah point 8 a tla zep mek a, tTop 4 huang luah a, champions league khel phak turin United hian hmasawn an mamawh.
Wolves laka chakna goal thuntu kum 18 mi Kobbie Mainoo chuan a chawrchhuahna club tan EPL-a chakna goal a thuna mai chu mang phan ram, a taka thleng ta ang mai a nih thu a sawi a. A goal thun chuan a tihlim tak zet a, inrintawkna sang zawk a pek thu a sawi tel bawk. Kum 18 mi Mainoo hian Manchester United senior team tan vawi 11 a khel tawh a, english rawlthar beiseiawm ber zingah a tel.
Ningani zana inkhel dangah West Ham United leh an mikhual AFC Bournemouth te chu 1-1 in an inhnehtawk. London Stadium a lenglut Bournemouth hian bul an tan tha viau a, minute thumna lekah Kalvin Phillips tihsual hremin Dominic Solanke-a’n hmahruaina goal a thun. Hma taka goal chhuah Hammers tan hian Phillips chuan minute 61-naah penalty hlawhchhuakin a mualpho lutuk tur a khuh mawi. He penalty hi James Ward-Prowse-a’n pet goal in an si phurh a sut a. Goal khat ve ve thunin an inhnehtawk zui ta a ni.