Jharkhand Mukti Morcha kaihhruai tangrual sorkara MLA-te BJP-in an ruk an hlauh avangin Ninganiah khaw awm danin a zir loh avangin Ranchi chhuahsan thei lo mah se Zirtawpni khan an chhuak ta.
Zirtawpniah Champai Soren-a chu chief minister thar atan lak luh a ni a, a hnu lawkah Hyderabad-ah an zavaiin an thlawk chhuak zui a ni.
Zirtawpni tlaiah MLA-te hian Congress rorel mekna, chhim lama Telengana khawpui, Hyderabad an thleng a, kartawp an cham phawt dawn.
An tanrualnaa hruaitu pakhat chuan Champai Soren-a hi chief minister atan lak luh ni mah se buk a ni dawn tih a sawi a. “Hetih hun chhung hian BJP-in kan MLA-te an biakpawh kan phal dawn lo,” tiin a sawi niin news agency PTI chuan a tar lang.
Jharkhand-ah hian Nilaini khan Chief Minister Hemant Soren-a chu ei ruk thubuaiah ED-in an man a, a hma lawka bânna thehlutin a aiawh turin Champai Soren chu tih a ni a, lak luh a ni ta a ni.
Champai Soren-a rual hian Congress hruaitu, Alamgir Alam leh RJD hruaitu, Satyanand Bhokta te chu lak luh an ni bawk.
JMM kaihhruai tangrual sorkar hi February 5-ah assembly-ah buk a ni dawn.
An MLA rualte hi Ningani khan Ranchi atanga chhuahpui tura tih an ni zawk a; mahse, khaw awm danin a zir loh em avangin an thlawk thei lo va. BJP chuan Champai Soren-a kaihhruai sorkar thar lak luh a nih reng laia hetianga an che vel hi a chhan an zawt leh ve mek thung.
Tangrual sorkar hian thlawptu MLA 41 neih ngaiah 43 an nei mek a. Assembly-a member 81 awmah JMM-in 29, Congress-in 17, RJD leh CPI(ML) ten pakhat ve ve an nei a. Lehlamah BJP-in bial 26 an chang a, AJSU-in pathum leh independent leh party dang MLA pathum an awm bawk.
Soren-a hi man a nih hnuah Ningani khan special PMLA court-in ni nga chhung Enforcement Directorate kawl turin a ti a. Supreme Court hnenah an manna hi khing let mah se court sang ber hian ‘an inrawlhna tur a ni lo’ tia chhangin a duh chuan Jharkhand High Court-a kal turin a ti.
Soren-a tana court-a ding, Advocate General Rajeev Ranjan Singh-a chuan a dinsak hi a himna venthawnpuina avangin lung inah a awm ngei a ngai tih a sawi.
Thlawhna pahnih hmanga MLA 40 vel Begumpet tumhmuna thlawhna pahniha thleng hi AICC Telangana in-charge Deepa Das Munshi leh state Transport Minister Ponnam Prabhakar ten an lo dawngsawng.
Hyderabad daia Leonia Resort-ah an inkulh dawn nia sawi a ni a; mahse, a hmun tak hriat a ni lo va. Sawi dan thenkhatah pindan 70 zet hauhlawk a ni tawh a ni.
MLA-te hi chawlhkar tawp zawng resort-ah hian an awm ang a, sorkar buk huna inlan turin Ranchi-ah an thlawk haw leh dawn a ni.