Aizawl: Chief Minister Lalduhoma hovin nimin khan CM Meeting Hall-ah Mizoram châk lakna kawngpui Vairengte leh Sairang inkar kawng chhe zual thawm vat dan tur leh four lane tura hnathawh tan thuai dan tur ngaihtuah a ni.
He hunah hian PWD Minister Vanlalhlana chuan kawngpui thawm that a tul tawhzia te, mipuite mamawh phur thin Truck Owners Association te pawhin Chief Minister hnena an thlen tawh thu leh fur a lo thlen leh mai dawn vanga hmanhmawh a tul thute sawiin, hma lak nghal dan tur an sawi zui a ni.
NHIDCL lam hian an chanpual chin te chu fur hmaa a tul zual an khawih theih tur thu an sawi a. Forest Clearance a fel chuan four lane hna pawh an tan nghal mai dawn tih an sawi.
PWD lam te pawhin an enkawl chin chu a chhiat lutuk loh thu leh a tul zual lai an khawih nghal tur thu an sawi a. Council of Minister meeting-in a ngaihtuahzui ngai thil te chu thutkhawm neih leh hmasa bera agenda atan dah peih hman an tum thu an sawi bawk.
Thutkhawmah hian Adviser to CM, TBC Lalvenchhunga leh hnathawh tur kaihhnawih department mi pawimawhte bakah, PWD, Planning, Environment, Forest & Climate Change leh Law department aiawhte an tel a ni.