Aizawl: Mizoram Pradesh Congress Committee (MPCC) Vice President Lalnunmawia Chuaungo chuan ram leh mipuite tana pawi tur sorkarin a khawih a nih chuan mipui thlavang an hauh ngei dawn niin a sawi.
Nimin khan MPCC chuan Congress Bhavan-ah political session hun an hmang a. He huna thusawitu MPCC Vice President Lalnunmawia Chuaungo chuan, tun hma chuan Congress leh MNF chauh mipuiin duhthlan tur an nei a, chu chu kalphung a nih thu sawiin, “Party mal thlawptute vote ringawtin sorkarna siam turin a tlin theih loh, neutral te awn lam lam a ni mai,” tiin, Congress party chu mipuiin an rin tawk turin hmachhawp an neih a ngaih thu leh, Congress chu ram leh mipui tana thawk turin ZPM aiin an tha zawk a ni an tih turin tan an lak a ngaih thu a sawi.
Lalnunmawia Chuaungo chuan sorkar khalh ngiltu assembly chhungah mai ni lo pawn lamah te, ni tin khawsak kawngahte a ni dawn tih sawiin, “Congress party hi keimahni inchhek arbawmna tur ni lovin ram leh hnam, mipui te tana thawk tu kan ni a. Ram rawngbawlna kawngah theihtawpin tan kan la chhunzawm zel dawn a ni,” a ti.
Ram leh mipuite tana pawi tur sorkar in a khawih a nih chuan mipuite thlavang an hauh ngei dawn tih sawiin Lalnunmawia Chuaungo chuan, “Sorkar dinglai sawisel ngawr ngawr kan thlurbing dawn lo, ram leh mipui te tana tha tur thilah, ram leh mipui te pawikhawihna thilah chuan kan enliam mai mai dawn lo. Congress hi ram leh mipui ten harsatna hrang hrang an tawh atanga khaichhuak thei tura kan ngaih a ni,” tiin, sorkar mek te an policy te theih tawpa tihhlawhtlin tir tura nawr tur an nih thu a sawi bawk.