Boxing-ah palian huang a inhnek ngaihven hlawh ber Tyson Fury leh Oleksandr Usyk te inhnek hun tur sawn hlat a ni a, May ni 18-ah inhnek turin ruahmanna thar an siam.
Palian huangah kawnghren pali a awm hnua kawnghren pali inchuhna hmaber; Fury leh Usyk te inhnek hun atan hian February 17, 2024 ruat a ni a. WBA, WBO leh IBF kawng-hren kawl kawp mek Usyk hmachhawn tura WBC champion Tyson Fury chuan hliam tenau a tuar a, hei vang hian an inhnek hun tur sawn hlat angaih phah.
Kum 2004 hma lam zawng khan boxing-ah khawvel pawmpui kawnghren ngaihhlut hlawh pathum a awm thin a. 2004 hma lam zawnga champion kawng-hren awm thinte chu IBF, WBA leh WBC te an ni a. Kum 2004 atang khan WBO kawnghren a awm belh. Kawnghren pali; IBF, WBA, WBC leh WBO te lak tur a awm hnuin palian huangah kawnghren pali kawl kawp thei tumah an la awm lo. Tyson Fury leh Oleksandr Usyk te hian a vawi khat nan palian huanga ka-wnghren pali an inchuh dawn a. An inhneka chak zawk zawk hi palian huanga kawng-hren pali kawl kawp thei hmasa ber an ni dawn. Hei hi Fury leh Usyk te inhnekin ngaihven a hlawh em em chhan pawh a ni.
Palian huangah tla-wm nei lova kal tluang mek Tyson Fury hi palian boxer tha bera ngaih a ni a. Kawnghren pali kawl kawp thei hmasa ber ni tura rinkai zawk a ni nghe nghe. Ukranian boxer Usyk lakah pumraw lian zawk a nihna a chhawr tangkai thei tura ngaih a ni. Hetih lai hian inhnek a hmachhawn hnuhnung berah UFC champion hlui Fransis Ngaunnou lakah beisei a phak lo ve tlat thung.