Chile-a Valparaíso region-a ram nasa taka kang avangin mi 51 vel an thi tawh niin tual chhung thuneituten an sawi.
President Gabriel Boric chuan emergency puangin bei let turin ‘a theih ang apianga hma an lak tur thu’ a puang.
Chile-in ram kang a tawrh tawha thihna a tam ber tum nia ngaih a ni tawh a. Thi zinga tam tak hi nipui chawlh hmanga vaukam lama hun hmangte an ni hlawm.
Health ministry chuan Valparaíso velah hian hriselna lama inkaihhruaina tur a puang bawk.
Ministry hian inzai ngai zinga tul zual lote chu zai rih loh turin a ti a, field hospital (damdawi in siam chawp) din turin a ti bawk.
A bul hnaia damdawi zirlaite pawh an zirna chawlhsan riha thawktute pui tura tih an ni tih ministry chuan a sawi bawk.
Chhanchhuah hna thawktute chuan a tuar nasa zual hmunte an la thleng hlei thei lo va, Interior Minister Carolina Tohá chuan ‘reilo te hnuah thi zat hi an pung thei’ tih a sawi bawk.
Chilean sorkar hian mipuite chu ram a kanna lai vela zin chhuak rih lo turin an ngen bawk.
El Olivar-a cheng kum 61 mi chuan an thil tawn chu ‘hremhmun’ ang mai a nih thu a sawi.
AFP news agency hnenah Rodrigo Pulgar hian an thenawmte puih a tum laiin ama in ngei pawh a kang tih a sawi.
“Ruah ang maiin meivap hi a lo tla sung sung mai a ni,” a ti.
El Olivar-a cheng tam zawk hi kum upa an ni a, a thenawmte hi an tlanchhiat theih loh avangin an thi tih a sawi.
Housing ministry chuan chenna in 3,000 atanga 6,000 inkar velin kangmei hi an tuar niin a sawi.
Inrinni khan Viña del Mar, Limache, Quilpué leh Villa Alemana-ah te chuan curfew puan a ni.
President Boric-a chuan curfew puan hian kawng a tithawl ang a, rikrum lirtheiten awlsam zawkin kang tuarte an thleng thei dawn niin a sawi.
Kang thelhtu 1,400 vel Pathianni khan inrintir an ni tih interior minister chuan a sawi.
Sipaite pawh chet chhuahtir an ni a, kangmei a chhuah chhan hi chhui nghal mek a ni bawk.
An buai mekna belhchhaha a awm loh nan sorkar chuan Valparaíso leh a thenawm, Marga Marga region-ah chuan sa siam thei mei leh khawl hman a khap.
An khawpui, Santiago atanga km 116-a hla, tuipui kama Valparaíso hian nipui laiin tlawhtu a ngah thei hle.
Tual chhung chanchinbute chuan regional committee for disaster risk management (Cogrid)-in kangmei chhuahnaah hian ruang 45 an chhar a, mi paruk dang chu damdawi inah an hliam tuar lovin an thi niin an sawi tih an tar lang bawk.
Nikum khan Valparaíso atanga chhim lam, Biobío leh Ñuble region-ah te ram a lo kang vak tawh a, tun tuma mite erawh a nasa zawk thung.