Aizawl: Aizawl Municipal Corporation (AMC) chuan insak phal lohna hmun (protected area)-a in sa lui, Lalramsanga chu a insak thiat turin a hriattir a. Dan zawm loa insa leh lei lai nia hriatte chungah hma a la mek.
AMC tar lan danin, municipal commissioner chuan January 31, 2024 khan in thiat tura hriattirna (demolition order) tichhuakin, in sak phal lohna hmuna sorkarin a puan, Bawngkawn – Durtlang Road-a in sa lui, Lalramsanga chu a insak thiat nghal turin a hriattir a ni.
Demolition Order-ah hian Lalramsanga hi March 29, 2024 hmaa a in thiat zo turin hriattir a ni a, thupek a zawm loh chuan AMC-in a thiah sak theih thu leh, a thiah man senso chu Lalramsanga’n dan anga a chawi a ngaih tur thu hriattir a ni bawk.
July 12, 2023 khan Lalramsanga hi phalna nei lova Protected Area-a in a sak chhan sawi fiahna hun pek a lo ni tawh a, a insawi fiahna hi AMC chuan thu tlingah a pawmsak lo va. A in thiah a nih loh chhan tur sawifiah turin October 25, 2023 khan show cause notice pek a ni leh a, notice hi a chhang lo.
Bawngkawn – Durtlang Road-a protected area hi Aizawl Master Plan Vision – 2030 anga puan a ni a. Aizawl hi chenna nuam taka siam tur leh in leh lote a him zawkna tura AMC hmalakna khauh taka kenkawh zel tum a ni a. AMC chuan dan loa lei lai leh insa mek nia langte pawh endik zelin an chungthu ngaihtuah zel a tum a ni.