Union budget session neih mekah nimin khan rorelna in hnih, Rajya Sabha leh Lok Sabha-ah chuan thil hrang hrang avanga eptute an bengchhen avangin rorel mumal thei lova tihtawp leh a ni.
Rajya Sabha-ah hian Samajwadi Party, BSP, RJD leh party dangten college leh university-a faculty recruitment system thlak danglam duh lohna lantirin an bengchheng a. Chawhnua inkhawm tan leh veleh Assam-a NRC kalpui chungchang leh Samajwadi Party hruaitu, Ram Gopal Yadav-an zirna in sanga point 200 awmna roster system chungchang tha a tih loh thu a au chhuahpui nghal.
Deputy Chairman Harivansh chuan Zero Hour-a sawiho tur a tih laiin Samajwadi Party member-te hian a hun laia sawi an ngiat tlat a. Chairman-in House pahnih member-te hmaa president thu sawia Motion of Thanks put luh tur a tih pawh mumalin an kalpui thei lo a ni.
Hetih lai hian human resource development minister Prakash Javadekar chuan roster system chu a tulna hmunah chauh tihdanglam a nih thu a sawi a. Sorkarin court-ah ennaw turin petition a thehluh thu leh reservation system a khawih em tih pawh ennawn tum a nih thu a sawi a; mahse, bengchheng a tawp loh avangin inkhawm tihtawp zui a ni.
Lok Sabha-ah chuan minister of state for home affairs Kiren Rijiju chuan 125th Constitution Amendment Bill, 2019 a pharh a. He bill hi India hmarchhaka Sixth Schedule-a autonomous council-te thuneihna tihlenna tur a ni.