British lal, King Charles III chu a cancer tih hriat chhuah a ni a, enkawl nghal a ni a, a khawi lai nge cancer tih erawh puan a la ni lo.
King cancer hi ‘a tir tê’ a la ni a, Rishi Sunak-a chuan lal nen hian an la inbepawp reng tih a sawi.
Prime minister hian lal a cancer tih thu chuan ‘a barakhaihin pawi a ti hle’ tih a sawi a; mahse, No. 10 (prime minister chenna leh a pisa) leh monarch hi ‘dan pangngaiin’ an la inbepawp reng tih BBC a hrilh.
Kum 75 mi, King hian a tih tura ruahman lawkte a sawn hla rih nghal vek a, Thawhtanni atang khan a natna hi enkawl tan nghal a ni.
Buckingham Palace chuan King hi a englai nge cancer a puang lo va, thla hmasaa damdawi in a luh phahna, prostate cancer erawh a ni lo tih an sawi.
Sunak-a chuan kar tin an inhmuh ziah thin ang chu dan pangngaiin a la kalpui dawn tih a sawi a, mi dang a hmuh ngai leh hmuh thin tam tak erawh doctor thurawn angin tihtlem a ni thung.
Palace pawhin King hian an ram hotu ber a nihnaa dan anga a tih ngaite chu a la ti zel dawn tih a puang a, heng zingah hian lehkha thil leh mi mala mi kawm tur angte a tel.
Thawhtanni khan Palace hian an enkawlnaah lal hian harsatna a neih loh thu leh a nun dan pangngaia nun leh theih thuai a inbeisei tih a puang.
Pathianni pawh khan inkhawmin minute 10 chhung mipui hmuhah a inlan a, tunah erawh Sandringham-a an in atanga inenkawl thei turin London-ah a awm leh tawh thung.
Thla hmasaa a nupui, Princess of Wales an zai hnuah Prince of Wales pawh a tih tur pangngai ti turin a kir leh thei dawn mek a, ani hian a pa theih loh chhung hi kawng tam takah a ai a awh tura rin a ni.
King hian a dinhmun hi a fapate pahnih a sawipui tawh a, Prince William-a nen bik phei chuan an inbe reng a ni.
United States-a cheng, Duke of Sussex pawhin a pa hi a be tawh a, a kan turin UK a pan nghal a, Thawhlehni chawhnu khan a thleng.
Palace chuang engtik atang nge King hian a hna a chhunzawm leh theih dawn an la puang lo.
Kumin kum tawp lama Canada, Australia, New Zealand leh Samoa a tlawh turte pawh a thei dawn em tih a chiang thei rih lo.
King hi thla hmasaa London damdawi ina a prostrate enkawla chawlhkar khat aia rei a awm hnuah a cancer tih hriat chhuah a ni.
Thawhtanni khan Palace chuan a cancer thu hi a puang a, King hian a dinhmun chu vantlanga puan a duh zawk tih an sawi bawk a. Prince of Wales a nih lai khan cancer kaihhnawih charity eng emaw zatah patron a lo ni tawh thin a ni.
Kum 1997 leh 1999 inkara Queen Elizabeth II press secretary thin, Simon Lewis-a chuan King-in inhawng taka a dinhmun a puang ta mai chu a fak a, ‘kum 20 liam taah kha chuan chiang lo takin, tawi tê chauh thuchhuah’ a awm thin tih a sawi.
UK-a cheng mi pahniha pakhat zel hian a dam chhungin eng cancer ber emaw an nei ziah.
Cancer hi chi hrang 200 chuang a awm a, UK-ah hian hnute, chuap leh prostrate chu a langsar zual an ni tih NHS website chuan a tar lang.
Cancer chi hrang hrangte hi kum upat hnuah vei a awlsam zual a. UK bikah pawh hian kum tin cancer vei thar zinga hmun thuma thena hmun khat aia tam (36%) mah chu kum 75 leh a chung lam an ni.