Aizawl : South Tuipui bialtu MLA Jeje Lalpekhlua’n nimin khan a bial chhung khua – Tarpho, Khawhri, South Chawngtui leh Cherhlun te a tlawh a, pawl hrang hrang hruaitute kawmin school leh sawrkar building siamthat ngai te a enfiah bawk.
Jeje Lalpekhlua chuan South Tuipui mipui zawng zawng MLA a nih thu sawiin, bial chhung hmasawnna turin theihtawp a chhuah zel dawn tih a sawi a. Sawrkar kumthar-ah South Tuipui bial chuan hmasawnna hmel a hmu chho zel dawn nia sawiin, an theihna zawnah theuh theihtawp chhuahpui zel turin mitin a sawm.
South Tuipui bialtu MLA chuan zirna te, hriselna te, ei leh bara intodelh te, electric leh tui hnianghnar tura hmalak te, infiamna lama hmasawn zual zel te, ramri leh tourism lama hmalak te, ruihhlo leh sualna hrang hrang a rem theih nana hmalak te, inkal pawhna leh inbiak pawhna tha leh zual tura hmalakte, ran vulh leh thlai chin lama tan la thar turte leh ram pawn thlenga thlai thar chhuahte thawn chhuak turin hma an la chhunzawm tur thu a sawi a. Sawrkar hmalakna thlawp zel tur leh mahni theihna zawnah theuh hmasawn tura hma la ve theuh turin mipuite a sawm a ni.
Bialtu MLA hian tunkar hian a bial chhung khaw hrang hrang a tlawh kual chhunzawm zel dawn a, Feb ni 10 ah Hnahthial khaw chhunga VC member-te nen an inkawm anga, Feb ni 12 ah Hnahthialah MLA Office an hawng ang.