Aizawl: Silk Samagra-2 hmanga silk pangang khawi kawnga hmalakna thar tur project pathum chu nimin khan Chief minister Lalduhoma’n a hawng a, he project hnuaia hamthatna dawngtu thlan kawngah ruling party mi duhsak an remti dawn lo tih a sawi.
Chief Minister Duha’n project pathum a hawn takte hi Rs. nuai 624 47 senna tur Eri Project, Lai Autonomous District chhunga chhungkaw za thlan chhuahte nena kalpui tur te; Rs. nuai 588.36 senna tur Mulberry Project, Chakma Autonomous District Council chhunga chhungkaw za thlan chhuahte hmanga kalpui tur leh Rs. nuai 1,339.61 senna tur Muga Project, Mizoram pum huapa chhungkaw zanga thlan chhuahte nena kalpui turte a ni.
Duhoma chuan project pathum an hawn tak chu lo neitu mi 700 huam tur a nih thu sawiin, project hnuaia hamthatna dawng tur thlan kawngah an fimkhur a tul thu leh ruling party mi leh sa an nih avang duhsak bik neihte rem an tih loh thu a sawi a, tun hmain hetiang induhsakna hi an lo ching tawh thin a, hmalaknate a hlawhchham phah nasa thin, a ti a. Sorkar tharah chuan mipui sorkar a nih angin tute emaw duhsak nana hmang lovin a hlawhtling ngei turte ngei thlan tum tur a nih thu a sawi.
Chief minister-in a sawi danin tunah hian khaw 200 chuangah chhungkaw 4,000 aia tamten pangang an khawi mek a, an tharchhuah hralhna rate hi sawrkar chuan tihsan a tum a ni.
Mizorama sericulture hmalakna thar tur project hawnna hi Thenzawl Golf Course Auditorium-ah neih a ni a, khualzahawm Sericulture Minister Lalthansanga pawhin thu a sawi a, project thar pathumte hian nasa takin Mizoramah cocoon tharchhuah a tipung dawn a, a vulhtute bakah a kaihhnawih eizawnna kawng tam tak a siam bawk dawn tih a sawi a ni.