Aizawl: Congress party hruaitu thlanna nei turah president chuh turin Zodintluanga Ralte-in nimin khan hming a pe lut a, an party tinung tura president chuh a nih thu a sawi.
February 20, 2024-a MPCC inthlanna neih tur atan Zodintluanga chuan election department-ah nomination file-in, a thurualpui, C. Ngunlianchunga’n vice president post chuh tur leh Lalrindika Ralte ten treasurer post chelh turin hming an pe lut bawk.
Hemi hnua chanchinbu mite an kawmnaah Zodintluanga chuan an party chu tihnun a ngai a, an party mite tiphura kum 2028-a MLA inthlanpuia Congress party chakpui tura OB post-te hi chuh an ni a, an thiamnate chu party tan an hmang dawn tih a sawi.
Zodintluanga chuan an thianho chu Congress party mi nghet an ni thu sawiin, amah chanchin a sawinaah kum 20 chhung Congress MLA lo ni tawh, party-ah pawh thalai leh party puiah te pawh elected OB lo ni tawh a ni tih leh vice president chuh tur, Nguna chu Congress MLA neih chhun ni mek, VC leh district council-ah pawh Congress ticket-a thlan tlin lo ni a, an hruaitu hlun a nih thu leh Rindika pawh Congress MLA lo ni tawh a, assembly house-ah pawh an party kaltlanga ram tana theihtawp lo chhuah tawh an ni a, mi hrang hrangin an rem khawm ve mai an ni lo tih a sawi.
Zawhna chhangin AICC emaw, MPCC emaw hruaitu thlanah official candidate an nei ngai lo tih a sawi a, line up siam vek hnua official candidate inphuahchawp chu thil tih ngai a nih loh thu a sawi bawk.
Congress party hruaitu thlanna neih turah hian elected OB post pathum atana official candidate Lal Thanzara, Lalnunmawia Chuaungo leh Dr Lalmalsawma Nghaka te chuan nomination hi an lo file tawh bawk a, OB post chuh tura hming pe lut hi mi paruk awmin, excutive member 60 thlan chhuah tura hming pe hi mipa 85 leh EM hmeichhia 16 an awm tawh a ni.
Tar lan tawh thin angin MPCC elected OB thlanna hi February 10 chawhma lamah neih a ni anga, chawhnu lamah executive member thlanna neih chhunzawm a ni ang.