Aizawl: Mizoram Pradesh Congress Committee (MPCC) chuan nimin khan Congress Bhavan-ah Friday Political Session an nei a. He hunah hian MPCC Treasurer Dr Lalmalsawma Nghaka chuan BJP sorkarna apiangah Kristiante nekchepin an awm zel niin a sawi.
MPCC treasurer chuan Uttarakhand-ah chuan an vei em em UCC hman a ni tawh tih sawiin, “Keini Mizo Kristiante hi kan inngaihtuah chian a ngai tawh hle. Mizoramah him reng nia kan inhriat laiin zawi zawiin nek hret hret kan nia, chimral kan ni thei dawn,” tiin, he thil hi Congress chauh ni lo vin, MNF leh ZPM te pawh hian ngun takin ngaihtuah se a duh thu a sawi.
BJP-te foundation agenda-te zinga a lian zual pathumte chu – Ayodhya-a Ram Mandir din, Article 370 Abrogation (nuai bo) leh India rama Uniform Civil Code dan siam a ni tih sawiin Dr Lalmalsawma Nghaka chuan, “Pahnih an tihlawhtling tawh a, pakhat hi tihhlawhtling hmabak a ni. Sakhaw zalenna duhtute leh Mizoram mipuite pawh ka ngaihtuahna kan hman uluk chhoh hle a ngai a ni,” a ti.
Dr Lalmalsawma Nghaka chuan tun laiin India leh Burma inkarah daidanna bang siam tum thu a lar hle tih sawiin, “Free Movement Regime min tihtawpsak tawh bawk a, hei hi hmun hrang hrang Zofate zawi awia dan hmanga min daidan tumna a ang riau, daidanna bang avanga then hran kan nih chuan a hnam pum angin a pawi hle dawn a ni. Nagaland CM chuan ram mipuite min rawn hmasa rawh se a ti a, kan CM hian a ti ve thei dawn em?” a ti bawk.
Tunah hian Mizoram Congress a hniam hle a, intuai thar a ngai hle tih sawiin, “Mupuiin a thlate a thlak a, van sang taka a thlawk leh angin, Congress party hi Pathianin mipuite rawngbawl tura min hman leh theih nan mipuite tan inpe ral raihin insiam thar leh ang u,” tiin MPCC Treasurer hian a sawi.