India ram pumah, sorkar chhinchhiah dan hi a dik a nih ngai chuan chhungkaw 28,500 (0.1%) chiah power supply nei lo an awm tawh a, heng mite hi district panga huam chhunga mite an ni a, tun thla chhungin heng mite pawh hi electric êng pek vek hman tum a ni.
Sorkar website atanga a lan dan chuan Rajasthan-a Udaipur district-ah chhungkaw 8,500 velin êng hi an la nei lo va. Chhattisgarh-ah Bijapur, Narayanpur, Dantewada leh Sukma district-ah te chhungkaw 20,000 velin êng hi an la nei zo lo bawk a. Chhattishgarh bikah hian êng neih lohna khuate hi left-wing extremism an tihte tamna a ni a, khaw 553 vel huam an ni.
Sorkar laipuiin a kalpui mek, ram chhunga chhungkua zawng zawngte electric êng pek vek tumna hi March thlaah zawh hman tum a ni a, chhungkaw vbc 2.5 zet êng pek tur chu zawh tep a ni tawh a. Khaw 19,614 zetah electric pawh luh thar a ni dawn tihna a ni.
Sorkar thuneitute chuan, “Chhungkaw vbc 2.48 hnenah êng hi pek a ni tawh a, ni 10-12 vel chhungin hmabak pawh hi zawh hman kan inbeisei,” tiin an sawi.
Power minister RK Singh pawhin hnathawktute hi a vil hneh hle a, state sorkarte chu a hma thei anga hna thawk zung zung turin a nawr a. Chief minister-te be kualin sorkar tum chu a hlawhtling em tih ngun taka vil turin a ti.
Sorkarin in tin êng pek a tumna, PM Saubhagya scheme hi Modi-a sorkar flagship programme niin March, 2019-a zawh tum a ni a. Scheme tan tirh a nih khan chhungkaw vbc 4 vel hi electric nei lo an ni.
Electric nei lo hi Uttar Pradesh-ah an tam a, chak taka hma lak a ni a, “Tunah chuan he state-ah pawh hian in tinah êng hi pek a ni tawh,” tiin thuneitute chuan an sawi.