Pakistan inthlanpui result kimchang chhuak taah lung ina tang mek, prime minister hlui, Imran Khan-a kaihhruai PTI party thlawp independent-a dingte chu bial la hnem ber an ni ta.
National Assembly-a thu tur thlannaah hian independent-a chuhtu mi 101 zet an tling a. Heng zinga 93 zet hi PTI-in an thlawp an ni.
Prime minister hlui tho, Nawaz Sharif-a kaihhruai PMLN chuan bial 75-ah hnehna an chang ve bawk a, a la tam ber dawt niin sorkar siamtu tur a la hriat lo.
Hetih lai hian boruak a la tang hle a, independent-a ding, tling zo ta lote chu court-ah kalin vote tihchingpen a awm tih an sawi.
Inthlana din an phal loh, PTI leh Sharif-a PMLN te hian sorkar siam an tum ve ve.
Inthlan result hi thlir lawktute beisei loh tak a ni a, Sharif-a party hi an rama thiltithei tak, sipaite thlawp an nih avangin chak ngei tura ngaih an ni a. Khan-a hi chu ei ruk thubuai bakah a nupui neih danah dik lo awm nia puhin lung inah dah niin inthlan chuh pawh phalsak a ni lo.
Sorkarna siam turin National Assembly-ah thlawptu 169 tal neih a ngai a, tangrual sorkar lo chu tuna a lan danah chuan din ngaihna a awm lo.
Pathumna dinhmun hauhtu, PPP hotupa, Bilawal Bhutto chuan tunah chuan PTI emaw, PMLN emaw nen engmah indawrna an nei lo tih a sawi a. Hetih lai hian PMLN erawh chuan Bhutto-a pa leh Sharif-a unaupa chu Lahore-ah an inkawm tawh niin an sawi thung.
Karachi-a hmunpui nei, MQM party pawh beisei aia che thain bial 17 an la a, tangrual sorkar siamna tura pawimawh tak an ni thei.
National Assembly-ah hian thutna 366 awmin heng zinga 266 hi mipuiin an thlan a ni a, 70 chu hauh sa (reserve) niin 60 chu hmeichhiate tan leh 10 chu Muslim ni lote tan a ni a. Heng hmun hauhsate hi mipui thlan tlin party-te hian member an ngah dan azirin an inchan sem thin.
Pakistan ram danah independent candidate-te hi tling mah se parliament-a hauh sa seat-ah chanpual an nei thei lo.
Pathianni khan police chuan Rawalpindi-a electoral commission building panna kawngpui chu lungawi lohna lantir tumte dan nan an khar a. Islamabad-ah chuan dan pela chete lakah na taka chet ve a nih tur thu sawi a ni bawk.
PTI chairman chuan electoral commission pisa tualah buaina siam lovin result lem siam leh tihdanglam duh lohna an lantir tih a sawi.
Inrinni khan sipaite thlawp, Sharif-a chuan sorkar siam turin party dangte puihna a lo ngen tawh.
Sorkar siam thei tur khawpa chak an awm lh hnuah mi thiamte chuan Pakistan hian ‘politics nghet lo rei tak’ an la tawn a rinawm niin an sawi hlawm.
Chatham House think tank-a mi, Dr Farzana Shaikh chuan Khan-a nena inzawmna nei independent-te hi sorkar siam phalsak an nih a rinawm loh thu leh mi tam takin ‘nghet lo taka thawhhona’ chuan Sharif-a leh PPP tang dun sorkar a hrin mai an ring niin a sawi.
Hetih lai hian PTI-in a thlawp candidate paruk chuan an chak zawh loh hnuah dan anga bei let turin court-ah an zualko nghal.
An zinga mi, Lahore-a Sharif-a khingtu, Yasmin Rashid pawh a tel a. Anni hian inthlan result chu phuahchawp ngei niin an thlen.
Pakistani thuneitute erawh chuan hetiang engmah a awm lo niin an sawi ve thung.