South Tuipui bialtu MLA Jeje Lalpekhlua’n Hnahthial-ah MLA office an hawn tur thu a sawi a. Hnahthial-a MLA office-ah chuan complaint/suggestion box an dah dawn niin a sawi bawk.
Jeje Lalpekhlua chuan a bial chhung khua, Darzo, South Vanlaiphai, Muallianpui, Lungpuitlang leh New Kawnpui te a tlawhnaah he thu hi a sawi a. Bial mipui ten amah an dawr theihna turin heng hmun hrang hrangah hian hun a hawng zel a, mipui, khawtlang hruaitu, NGO hruaitu leh party hruaitu ten mamawh an neih te a hnenah an lo thlen hlawm a ni.
South Tuipui bialtu MLA chuan Pathian leh South Tuipui mipuite duhsakna changa MLA atana thlan tlin a ni ve chu lawmawm a tih thu leh bial mipuite duhsakna leh theihtawp chhuahpuina rah a nih thu sawiin, lawmthu a hrilh a. Inthlan result puan a nih tirh khan bial fanga kal kual duh viau mahse, training avanga a hman thei lawk lo chu pawi a tih thu a sawi.
Jeje Lalpekhlua chuan, hun kal tawhah khawtlang hruaitu VC ten an khawtlang MLA in an tlawh tur an hriat ngai loh thu an sawi chu mak a tih thu sawiin, “keini chuan kan rawng ni lo VC an nih pawhin kan hriattir zel dawn” a ti a. ZPM member te tan chauha MLA ni lova, South Tuipui mipuite tana MLA a ni tih hriatsak theuh tura chahin, thlei bik nei lova hmalak a nih tur thu a sawi a ni.
Chief Minister a tan em avangin kawng hrang hrangah hmasawnna hmuh tur a awm mek zel niin Jeje Lalpekhlua chuan a sawi a. “Sawrkar kumtharah kan bial pawhin hmasawnna hrang hrang kan hmu chho zel dawn tih hriain, kan theihna zawnah theuh theihtawp chhuah zel ang u” a ti.
ZPM sawrkar hian zirna lam a hmasawn te, hriselna lama hmawsawn te, ei leh bara intodelh te, electric leh tui hnianghnar tura hmalak te, sports lama hmasawn zual zel te, ramri leh tourism lama hmalak te, sawrkar kalphung hrang hranga hmasawnna te, mipuite kawng engkima inrenchem leh zual tur te, ruihhlo leh sualna hrang hrang a rem theih nana hmalak te, inkalpawhna leh inbiakpawhna tha leh zual tura hmalak te, ran vulh leh thlai chin lama tan la thar turte leh ram pawn thlenga thlai thar chhuah te thawn chhuak tur tea hma nasa taka lak a nih tur thu a sawi a. “Hna te pawh a rawn chhuak dawn, tu pawhin thawk se a tha tur a ni a, keini chuan hnathawk tha lo kan duh lova, kan mi leh sa te phei chuan a tha thei ang berin kan thawk tur a ni” Jeje Lalpekhlua chuan a ti.
South Tuipui bialin hmasawnna tluantling a neih theihna tura hma an lakna kawng hrang hrangah amah tawiawm zel tur leh a tul dan azir zela thurawn pe thin turte, ram hruaitute tawngtaipui thin tur tein Jeje Lalpekhlua chuan a sawm a. Dikna leh rinawmna nen bial tana theihtawp chhuahpuiah a sawm bawk a ni.