Aizawl : Mizo Zirlai Pawl (MZP) chuan an hun tiam chhunga Govt. Nepali Primary School, Rangvamual chungchanga sorkar atanga hmalakna a awm loh avanga vawiina school sak hnatlang neih an tum chu thuneitute nen an indawrna avangin an thulh rih.
MZP thuchhuahin a tarlan danin, ni 11 February, 2024 (Pathianni) chawhnu dar 4 khan Aizawl West I bialtu MLA Pu TBC Lalvenchhunga Adviser to Chief Minister (Finance) hoin Education Department Director leh MZP Office Bearers ten Govt. Nepali Primary School chungchang an sawiho a.
Sorkar chuan, MZP ngenna angin vawiin atang hian Govt. Nepali Primary School zirlaite chu Rangvamual Community Hall-ah an sawn nghal dawn a. Hetah hian school building thar sak zawh a nih hma chu an dah lailawk dawn a ni. Tin, Samagra leh hmun dang atangin cheng nuai 26 hmangin School Building thar an sa tan nghal dawn a. Hmalakna hi chak taka kalpui an tum thu sorkar hotuten an sawi bawk.
Hetiang hi sawrkar hmalak tum dan a nih avangin leh MZP ngenna tih hlawhtlin ngei an tum avangin, vawiina Govt. Nepali Primary School sak hnatlang MZP-in a koh chu thulh rih a ni a. Sawrkar hmalak dan MZP chuan uluk takin enzui a tum a ni.