Khua a thal leh ta tak tak dawn. Kumtina khel lova thleng thin thal laia ramkang thin kan ngaihven a kan inven lawk a hun tan leh ta. Kum tina ram kang avanga kan ram ngaw leh ramhnuai hrim hrim lo bua chho zel hi tih tak taka kan ven reng a ngai.
Ram kang ven hun chhung hi thla tam pawh a ni lova. January atanga May thla chhung hi ani deuh mai a. Furah ram a kang ngai lova. Favang atanga khaw lo ro chho zel chu February chho vel atangin a kang duh tan a. Thla thum vel chhung chauh tal hi chu inven hneh tum tur kan ni.
Ram kang ven dan chu mihring kan fimkhur a ngai ani mai a. Ram thing leh mau hlutna hre phak lo tamna apiangah ram a kang nasa thin. A pawimawh ber chu mitin hian ram thing leh mau hlutna kan hriatchian hi a ni. Aizawl leh a chhehvelah hi chuan ram kang tur hrim hrim hi a tlem tawh a. Ram kan tamna chu thingtlang lam hi a la ni deuh a. A tih hi chu kan ti kang tlem telh telh niin a lang a. Ram ti kang tlem tura mitin fimkhurna tura hmalakna awareness hi kan nei thin a. Awareness hi Aizawl leh a chhehvelah ai chuan thingtlang lamah uar deuh deuh zel ila. Ram kang a pawizia hi media hrang hrangah nasa lehzuala beih a ngai a ni. Sawrkarin ram ti kang tlem lawmman a han siamte hi a tha khawp mai. Tupawhin a awmna apiangah ram tihkan loh an tum hun a thlen hlan hi a nghahhlelhawm takzet a. Chumi thleng tur chuan tan la sauh sauh ila. A bik takin environment and forest lam hian tun ang hun atang hian zoram tluanah ram kang hi veng sela. A hotute hi thingtlangah te zinchhuakin zirtirna pe mawlh mawlh sela. VC te hi vil tawt tawt sela. VC zawng zawngin ram tihkan loh chu an duty anga an neih ngei theihna turin an thinlung lam hneh a ngai a ni.