Aizawl: Chief Minister Lalduhoma’n Mizoram chu chhiah lakkhawm tur nei tam lo tak a nih avangin 16th Finance Commission funding dan turah special category state-a la dah chhunzawm turin Union Minister for Finance, Dr. Bhagwad Karad a ngen.
Mizoram mamawh thlena New Delhi-a zin Chief Minister Lalduhoma hian Inrinni khan Union Minister for Finance Dr Karad chu a chenna inah kawmin, sorkar laipuiin interim budget atanga a lan dana SASCI atan sum tak zawk ruahman a tum chu lawmawm a tih thu sawiin, Mizoram tana a kalpui dan awlsam zawk awm thei se a duh thu a thlen a. 16th Finance Commission kalpui hunah pawh Mizoram chu chhiah lakkhawm tur (revenue mobilise) nei tam lo tak a nih avangin, special category state a la dah chhunzawm zel turin a ngen.
Chief minister chuan Mizoram Rural Bank chu Mizorama bank inzarpharh zau ber leh mipuite pawhin an chhawr nasat a nih thu leh an CD Ratio pawh a that thin avangin, thawktute hlawh chu SBI-a thawktute hlawh zat pek ve ni se tha a tih thu te, Mizorama bank awmte, a bikin regional rural bank-ten thawktu indaih lohna a tawrh nasat avangin Mizoram tan emaw, India hmarchhak pual emaw tan thawktu tur lak runpui, special recruitment kalpui turin a ngen bawk.
Mizoramah private bank-te an pung zel tih sawiin Lalduhoma chuan, heng private bank-te hi thingtlang lamah an inzarpharh zau tawk loh avangin mipuiten an lo chhawr tangkai tawk lo niin a sawi a, zau zawka an inzarpharh theih nana hma laksak turin a ngen a. Bank thenkhatten an hnena loan diltute Income Tax Returns an lo phut thin chu income tax pek lohna state a nih angin Mizoramah phut tawh lo thei se a duh thu leh hma lo laksak turin a ngen a ni.
Dr. Karad hian chief minister thil thlente chu a kaihhnawih official pawimawhte a lo sawipui tur thu leh tun thla ni 16-ah ngaihtuah ho tura thutkhawm a ko nghal niin sorkar thuchhuahin a tar lang.