Inrinni zan khan AFC Asian Cup final khelh a ni a, inkhel hmuhnawm takah champion lai Qatar chu Jordan lakah 3-1 hnehna changin an champion nawn leh. Jordan laka Qatar goal thumte hi penalty atanga lut vek a ni a, goal thumte hi Best player leh Golden Boot dawng kawptu Akram Afif thun vek a ni bawk.
Fifa World Cup 2022 final khelhna Lusail Stadium-a Asian Cup final hi khelh a ni a. Champion lai Qatar leh a vawi khat nana champion tum Jordan in inkhel hmuhnawm an lantir. Inkhel hmuhnawm leh inbuk tawk daidantu chu penalty a ni. Inkhel tir lamah rin phak bakin Jordan an khel tha a, South Korea hnawtchhuaktu hian inlehthalna lian thlentir nawn leh an tum hle. Inelna thlengtu Qatar lakah khel chhe lo viau mah se an chesual a, penalty an chawi. Penalty hi top-scorer ni thei tura goal hnih thun mamawh Akram Afif chuan minute 22-naah a pet goal a, hmahruaina goal a thun.
Afif goal hian Jordan a chhaihkawlh a ni ber a, na takin an khingpuite an nawr zui nghal chat. Uiawm taka an hun tha an hlah hnuin minute 67-naah Yazan Al Naimat chuan chiang zetin a pet goal ta nge nge a, an si phurh a sut. 1-1 a nih hnu hian hmuhnawm leh hlauhawm zawkah Jordan an tang chhunzawm. Khel tha chho viau mah se an chesual nawn leh a, a vawi hnih nan penalty an chawi. Goal hmahruai thuntu Akram Afif chuan minute 73-naah hma an hruai nawn lehna goal a thun. An goal hnihna a thun chiah hian Afif hi hian inelna kal mekah goal 7 thun tlingin, top-scorer a ni ta chiah.
An si phurh sut nawn leh ngei tumin Jordan in tan an khawh thar a, hlauhawm siam thin mah se a tawp an khar tha thei lo. Goal thun tuma thapui an chhuah vanglai takin an vanduai leh tlat pek a, a vawi thum nan penalty an chawi. Goal hnih thun tawh Afif chuan goal hnih a thun tawhna lo lamah chiang takin minute 90+5-naah a pet goal a, inkhel pawimawh takah hattrick a siam ta nge nge. Afif-a’n hattrick a siam hnu hian goal dang a luh belh thei tawh lova, Qatar chu an champion nawn leh ta a ni.
Kum 2004 hnu lamah Asian Cup-ah champion nawn an awm thei tawh lova, Japan hnu lamah Qatar chu champion nawn leh hmasa ber an ni ta a ni. AFC Asian Cup 2023 hi China thlen tur a ni a, Covid 19 hripui vangin an thleng thei lo. China in an thlen theih tak loh vangin Qatar in an thleng nawn leh. Inelna an thleng nawn hi an champion nawn leh nana kawng pawimawh tak a ni zui ta bawk.
Asian Cup 2023 khelh zawh takah final-a hattrick siamtu Akram Afif chu player tha berah thlan a ni a. Afif hian goal riat thunin ‘Golden Boot’ a dawng bawk. Qatar champion nana thawhhlawk tak si nghak Meshaal Barsham chu si nghak tha berah thlan a ni bawk.