Inrinni zana English Premier League khelhah table chung luahtu pahnih Manchester City leh Liverpool ten hnehna an chang ve ve a, champion tumin an inum chhunzawm. Inkhel hmasa zawkah City in si hnih faia Everton hnehin Liverpool an lehpel hman a. Burnley lakah 3-1 a chakin Liverpool in City an lehpel zui ve leh nghal.
- Haaland a dam, goal a thun
Champion lai leh champion nawn leh tuma tan khawh Manchester City chuan Etihad Stadium-ah table hnuai lama awm mek Everton an mikhual a, hliam damkawr Erling Braut Haaland goal hnih thun hmangin hnehna an chang. Haaland hian November 2023 hnu lamah a vawi khat nan EPL-ah goal a thun a. Inelnaah goal a thun loh zawn rei ber tum a hman mek chu goal hnih hmangin a titawp.
City hian an mualah khel tha viau mah se goal erawh an thun har hle thung. Minute 71-naah Nathan Ake hnen atanga ball a hmuh chu Haaland chuan mawi zetin a hlap goal a, hmahruaina goal a thun. Ke hliam vanga chawl deuh reng Haaland hian EPL ah minute 419 chhung chu goal a thun lo tawh a. Hei hi EPL-a goal a thun loh rei ber tum a ni. Hun harsa a tawh mek chu Everton laka goal a thun hmangin a titawp a, a goal thun lawmin a nui ve leh thei ta.
Hmahruaina goal an thun hnuin City an khel tha chhunzawm a, goal an thun belh leh thuai. Minute 85-naah Kevin de Bruyne ball pek chu Haaland chuan fuh zeta khalh tlangin a pet goal a, an goal hnihna a thun. Haaland-a’n goal hnih a thun hnu hian hun tawp thlengin goal dang a luh belh thei tawh lova, City chuan si hnih faiin hnehna an chang a, point khatin hmahruaitu Liverpool an lehpel. City hi inelna hrang hrangah an chetha tluang viau rih a, inelna hrang hrangah vawi 10 an chak zawn na niin, EPL-ah vawi ruk an chak zawnna a ni bawl.
City in table chung ber an luah laiin point 10 zet an paihsak tawh Everton a che chhe zawn ve thung a, EPL-a an khelh hnuhnung vawi rukah chak an nei lo. An chak theih loh em vangin 18-naah an awm a, tlahniam thei dinhmunah an ding mek.
- A chung berah Reds an kir
City lakah an hmahruaina hloh hman zuk Liverpool chuan Anfield-ah Burnley an mikhual a. An mualah 3-1 a hnehna changin table chung berah an kir zui leh nghal.
Anfield a lenglut Wolves hi an ngampa viau a, Alison chetthat ni ni lo se point hmuh phuin an inlan. Goal an thun thei loh an tuar a, Reds in an hun tha an chhawr tangkai deuh zel bawk si a, point an hlawhchhuak zo ta lo a ni ber mai. Liverpool hian an mualah khel tha mah se goal an chhuah hmasa teuh hle. Wolves hun tha neih hmasak chu si nghak Alison Becker-a’n a tihthlawnsak a, team a chhan him phawt.
Wolves in an hun tha an hloh hnuin Reds in an hun tha neih an chhawr tangkai a, goal an thun. Alexander-Arnold corner pet tha tak chu Diogo Jota chuan awlsam takin minute 31-naah a tauh goal a, hmahruaina goal a thun. Goal an chhuah hnuin Wolves an khel tha sauh a, an si phurh an sut har lo. Minute 45-naah Dara O’Shea chuan top corner-ah mawi zeta tauh goal in an si phurh a sut a, 1-1 a inhnehtawk chungin chawlhlawk an hmang.
Chawlhlawk hnu lamah inkhel a hmuhnawm chhunzawm a, Reds in goal hnih an thun belh leh. Minute 52-na lekah Luis Díaz chuan hnaite atanga tauh goal in hma an hruai nawn lehna goal a thun. Hnufual zawka an tan hnuin Wolves in an khingpuite an nawr na hle a, goal thun theihna hun tha neiin, hmahruai let thei dinhmunah an ding. An hun tha an hloh zawn vangin Wolves hian goal an chhuah belh leh. Minute 79-naah Darwin Nunez chuan near post-ah fuh zetin a tauh goal a, an hmahruaina a tizau. Nunez goal thun hnu hian goal dang a luh belh thei tawh lova, 3-1 in Liverpool in hnehna an chang ta a ni.
An mualah an chak vangin Liverpool hian khelh 24 atanga point 54 hmuin table chung ber an luah let leh. An chunga awm hman zeuh City nen an inkarah point hnih a tlazep thar leh. Champion lai City ai hian vawi khatin an khel tam zawk thung a, Arsenal an hla lo viau bawk nen champion tuma inumna boruak a hot chho hle.
Inrinni zana inkhel dangah team lian Tottenham leh Newcastle United in hnehna an chang ve bawk. Tottenham hian an mikhual Brighton lakah si an phurh hmasak zet hnuin hun tawp dawn tep minute 90+6-a Brennan Johnson goal thun hmangin an chak let. Inkhel dangah Newcastle United chuan Bruno Guimarães goal hnih leh Fabian Schär goal khat hmangin mualneitu Nottingham Forrest an hneh.Inrinni zan hian Sheffield United pawhin hnehna an chang ve bawk.