AIFF Youth League khelh mekah Aizawl FC Under -17 leh in play-off khel phak turin chak an mamawh. V-Day a Shillong Lajong hmachhawn tur AFC U17 te hi thawhtana an khing North East United U-17 nen goal awm lovin an inhnehtawk.
Aizawl FC Under – 17 leh North East United U-17 te hi Thawhtan chaw-hma dar 11:00 khan Shillong MFA Ground-ah an inkhel a, goal thun thei an awm lo. AFC hi chawlhlawk hmain an khel tha zawk a, an vanneih ni a ni lova, goal thun theihna hun tha an neih an chhawr tangkai thei lo. Chawlhlawk hnu lamah North East United FC an insiamtha a, game thununtu zawk an ni. Inkhel thunun mah se goal an thun thei bik lo a, goal awm lovin an inhnehtawk zui ta a ni.
Thawhtanni a hnehna chang zo lo Aizawl FC U-17 hi table-ah pahnihnaah am awm mek a, hmahruaitu Football 4 Change Academy chu point 5 in an phak lo mek. Heti a nih vang hian playoff khel pha turin Nilaini chawhnu dar 2:00-a an khingpui tur Shillong Lajong FC an hneh ngei a ngai tawh.
AFC U17 leh Lajong U17 te hi round khatnaah an lo intum tawh a, Lajong hian si khat faiin hnehna an lo chang tawh. An hneh loh tawh hmachhawn tur an nih vangin AFC U17 hmabak a hautak viau dawn. An hmabak hautak mah se chak ngei an inbeisei.