Finance Minister Nirmala Sitharaman-in union budget 2023-24 a pharh takah SPG-ah hian sipai tha bik, special commando 3000-te sum hman tur atan Rs Vbc 592.55 dah a nih thu tar lan a ni a, hei hi kum hmasaa dah, Rs Vbc 540.16 aiin 10%-in a tam zawk.
Nikum mai khan SPG Act chu siam that (amend) a ni a, tun hmaa VVIP pali – prime minister bakah Gandhi pathum – Congress president Sonia Gandhi leh a fate pahnih, Rahul Gandhi leh Priyanka Gandhi Vadra an ven thin chu prime minister chauh ventir an ni tawh.
2021-22 chhunga SPG-in budget an neih chu Rs Vbc 540.16 a ni a, mi pakhat ven nan hian kum khat chhungin Rs Vbc 135 zel hmang ang an ni.
Kum thar tur atan nasa takin an sum dah tipungin an ven tur erawh pathum lai chhuhsak an ni thung a. Heti a nih chuan Modi ven nan sum hi a kal vek dawn tihna a ni a, kum kal meka Rs. Vbc 135 a chan thin chu a vaia changin a punna chu 340% zet a ni dawn ta tihna a ni.
Prime Minister Modi-a venna atana Rs. Vbc 592.55 dah hi ni khatah Rs Vbc 1.62 zel a kal dawn tihna a ni a, darkar khatah Rs Nuai 6.75 a ni ang a, minute khat ven man pawh Rs 11,263 daih a ni dawn bawk.
Nikuma SPG-ten an ven thinte tihdanglam an nih hnuah khan Gandhi chhungkaw pathumte hi CRPF-te ventir an ni tawh a. CRPF-ten an ven hi ram pumah mi 56 an awm niin nimina Lok Sabha-a zawhna a chhannaah Minister of State for Home G.Kishan Reddy chuan a sawi.
Prime Minister Indira Gandhi thah a nih hnua India rama mi pawimawh bikte vengtu tura din, Special Protection Group tana budget-a sum dah hi a kum telin a pung a tih theih a, BJP kaihhruai sorkar a din hnuah phei chuan a pung chak hle.
Modi kaihhruai sorkar a din hnu lawk, 2014-15 atana Rs Vbc 289 dah chu 2015-16-ah chuan Rs Vbc 330-ah tihpun dawrh a ni a. 2019-20 phei chuan Rs Vbc 535 zet dah a ni tawh a, hei pawh hi 2018-19 chhung atana Rs Vbc 385 dah atang chuan a pung nasa hle.