- PML-N leh PPP tangrual sorkar
Thil thleng thei langsar ber chu PML-N leh PPP thawk dun sorkar din a ni a, party tenau dang thlawpna an nei thei bawk ang.
Party pahnihte hi tun hma pawhin an lo tang dun tawh a, kum 2022 khan Khan-a paih thlain August thleng kha ro an lo rel dun tawh.
“An pahniha pawimawh lai chu tu nge prime minister ni ang a, tu nge president ni ang tih a ni a, hetih rual hian province hrang hrangah inepna an nei bawk,” tiin Prof Samina Yasmeen, University of Western Australia chuan a sawi.
PML-N hian bial 17 latu, Muttahida Qaumi Movement (MQM) pawh an dawr nia sawi a ni a. Independent candidate-te an pawh luh theih dan tur an dap bawk.
Zardari-a hian PML-N palai, Sharif-a unaupa, Shehbaz-a hote chu Pathianni khan Lahore-ah a lo kawm tawh a. PPP hian an thlawp dawn em a la hriat loh va, Islamabad-ah Thawhtanni khan thutkhawm an tum.
- PPP leh Khan-a PTI
PPP hruaitu hlun, Sherry Rehman chuan BBC-in PTI thawhpui an hreh em tih a zawhnaah eng party tan pawh kawng an hawng tih a lo sawi tawh.
Hetih lai hian Khan-a media advisor Zulfi Bukhari chuan PTI hian mahnia sorkar an siam thei lo a nih chuan tangrual sorkar siam ai chuan eptu nih an duh zawk tih a lo sawi tawh thung.
Tunah hian an hotupa ber, Khan-a chu thubuai hrang hrang avangin kum 14 lung in tang tura tih a ni mek a. Kum 2018 daih tawhah khan tangrual sorkar chu a nghet lo thei tih a lo sawi ve tawh bawk.