V-day chu a lo thleng ta a, he ni bik pual liau liaua hmangaih biahthu hlan leh sem chhuak te pawh Mizo thalaite zingah an tam ta hle.
Chutih laiin, a kawng hmang hre lo fe fe hi a tam zawk kan la ni tlat mai a, (a harsa em bawk a tin ni) A thenin, awlsamtea an sawi theih mai laiin, thenkhat tan erawh thlan tlaphunga inngaihtuah buai theih a ni tlat mai.
- Engtikah maw ni ang?
A hmasa berin, mahni leh mahni inchian hi thil pawimawh hmasa ber a ni. He nu/pa hi i hmangaih tak tak a, thumal pathum i hrilh tura hi i hmangaih chiah maw? ‘Ka hmangaih che’ tih hi tawngpawng namnul mai mai chi a ni lo. Chuvang chuan, i rilru chhungril tak taka i hriatchian a, i ti tak tak a ni tih i chian hun kha sawi chhuahna remchang tak a ni a tih theih ang.
- A hun leh a hmun
Tunah chuan i hmangaih tak tak a ni tih chianna i nei tawh a, i hmalakna hmasa ber tur chu a hun leh a hmun chungchanga thutlukna siam hi a ni. Sawi buai theih anih rualin, ‘Valentine’s day’ hi ni duhawm leh remchang ber a ni lo thei lova, (Ni bik a awm loh laiin V-day a ni ta mai si a) He ni ah kher hi chuan zawnglai tute pawh hi engti emaw tak hian an awm deuh vek mai a, chu taka chu ‘chance’ lakna remchang tak a ni. Zing kar hi a fuh lem lova, chhun pachang pawh a tihchi ber lova, nitla dawn lai vel boruak mawlh mai hi i tan a hrisel ti teh ang. Hmun fianrial chut thawh thawt a ngai lo. Remchang tura i hriatna leh i damchhunga i hriatrengna tur hmunte kha chu i ngaihtuah chhuak thiam tawh mai ang!
- Engtia sawi tur nge?
A hun leh hmun tur i chiang tawh a, a dawt leha chu sawi chhuah kha a ni. A tha ber la ni foa chu, pangpar nalh tak hmangin emaw gift a nih loh paw’n chocolate te nena inbarhluh mai kha a ni. Tute pawh hian present/ gift kan lawm vek a, chutih laiin he ni bik atan hian ‘chocolate’ hi inpek tam ber a nih fo avangin hman tangkai a sual lovang. ‘Ka neihchhun hmangaihna’ tih fo mai pawh hi dawt insawi siakna mai mai a ni a, hmangaih berte tana eng emaw pek tur nei lo khawpa rethei hi tawng mawi lo ni lo se, Van hnuaiah hian an awm dawn emaw ni le?
- Inbuatsaih rawh
A chhanna hi i beisei loh tak pawh a ni thei! Hmangaihte bula hmangaihna sawi hi General Napolean te meuh pawh an thingthit phah rawp rawpna a ni a, lo inlak ‘sek’ ve vakna chi chu a ni lo. A chhan let danah che hian i lungawi emaw awi lo emaw, i hnual emaw hnual lo emaw, i rilru a na emaw na lo emaw, i beidawng emaw dawng lo emaw, he hringnunah hian inchhirna i neih loh hun a la thleng tho tho ang. An sawi fo thin, ‘Thlen loh ai chuan tlai pawh a tha zawk’ tih hi.