Zep rual a ni lo! Taylor Swift ‘effect’ chuan TV lam thlir thup turin mipui a hipkhawm a, 1969 kuma Thla a lawn tih lova US-a TV broadcast entu tam ber ni turin Super Bowl 2024 a dingchhuak.
Kumin Super BOwl kha US-ah mi maktaduai 123.4 velzetin TV kaltlangin an thlir a, Apollo 11-in Thla leilung a rah kha mi maktaduai 124-150 velin an en anga chhut a ni a, Pathianni zana neih zawh tak Super Bowl khan a rawn hnaih ta ber a ni.
Taylor Swift hi a inlan hman ang em, tih chu a dawn hnaih lama zawhna tam ber a tling pha a, Japan rama concert nei lai mek a nih avangin a bialpa Travis Kelce tawiawm tur hian a rawn thlawk ha hman ang em, hman lo ang em, tih chu titi tui ber a ni hman hial.
An pahniha an inhaw lem lo taka an awmdun vel hmu chak an tam bawk nen, a hun leh hmun dik takah engkim a thleng rual a, chu chuan entu a kokhawm hum hum a ni ta ber.