Mizoram a Basketball inelna ngaihhluthlawh ber Mizoram Super League (MSL) season 9 khelh mekah nilainia inkhel hmuhnawm takah Zarkawt BCA chuan an khingpui Khatla TBL chu harsa takin an hneh.
Zarkawt BCA hian Khatla TBL lakah bul an tan tha lova, quarter hmasa berah point ngain hnufual zawkah an tang nghal. Bul tan tha tawk lo mah se an insiamtha thuai a, quarter hnihnaah point 15 ngawtin chungnung zawkah an tang let a, point 10 a hmahruai chungin chawlhlawk an hman
Chawlhlawk hnu lamah inkhel a hmuhnawm chhunzawm a, an inhnehtawk lehzual. Quarter thumnaah point hnihin BCA an chungnung hram a. An hmahruaina an tihzau belh. An khingpuite nen point 12 zetin inthlau tawh mah se TBL hian quarter thumnaah chak ngei tumin an khingpuite an nawr let a, point 7 in chungnung zawkah an tang. Quarter hnuhnung berah point 7 ngawtin chungnung mah se point ngain tlawm zawkah an tang ta tho a, BCA in hnehna hlu an chang.
Khatla TBL an hneh tum hian BCA player pawimawh Lalrina Renthlei chuan point 31 zet a thawkchhuak a, a chetha hle. BCA tan hian Lalnunpuia Renthlei chuan point 21 a thawkchhuak a. Zonunsangatn point 13 a thawkchhuak bawk.
TBL tan hian Joshua Aaron Keys chuan point 37 zet a thawkchhuak a, he inkhela point thawkchhuak hnem ber ni bawk mah se a team a chakpui zo chuang lo thung. Khatla TBL tan hian Vanlalthazuala chuan point 26 zet a thawkchhuak bawk. Mizo player te an hmuhnawm hlawm le.