Aizawl: Tlabung leh a chhehvela hmunphiah chingtute chuan a hralhna lamah an mangan avangin tun kar chhung sorkar hmalakna ngaihchan a, a bak chu anmahni thiam anga hralh dan dap an rel.
Nimin khan Zodin veng, Tlabunga VC House-ah Zodin Brooming Association leh Tippereghat Brooming Association hruaitute chu hmunphiah hralh chhuah chungchanga an harsatna chinfel dan tur ngaihtuahin an kalkhawm a, hmunphiah ro kg 1 Rs. 100 aia tlawm lova hralh a nih theihna tura Mizoram sorkar leh Kamrup-a RR Associates-ten inremna an lo ziah tawh anga hralh duhin sorkar leh RR Associates lam atanga hmalakna an ngaichanga hmunphiah hralh theih hun a liam tep tawh avangin an mangang tawh hle niin an sawi.
Hmunphiah chingtu intelkhawmna pawl pahnih aiawh kalkhawmte chuan tunkar chhungin hmunphiah hralh chhuah chungchanga sorkar hmalak dan ngaihchan ni se, hemi hun chhunga an beisei ang hmalakna a awmlo a nih chuan an thiam ang anga hmunphiah hralh dan tur an dap mai angaih tawh tur thu an sawi.
Zawhna chhangin hmunphiah chingtute chuan, tun dinhmunah hian Tlabung leh achhehvelah hmunphiah quintal 2,000 aia tlem lo hralh tur a awm theih an beisei tih an sawi a, tun dinhmunah hmunphiah hralh theih hun a liam tep tawh avangin an rilru a hah hle tih an sawi bawk.