Afghanistan ram cheng mi mtd 3 vel chuan hmanhmawhthlak takin ei tur an mamawh mek a, rang taka puih an nih loh chuan tamin an thi mai dawn niin United Nations chuan a sawi a. Indonain a tihbuai reng ram hian an ram chanchina khawkheng rapthlak ber an tuar mek niin a sawi.
Afghanistan ramin khawkheng a tawrh mek hian an ram hmar leh khawthlang lam a tuam mek a. Thlai chin, ran vulhin an tuar nasa em em a, tuihna a khawro zo tawh hlawm a. Hei vang hian mi tam takin an chenna in an chhuahsan mek a ni.
Hmun him zawk zawnga chenna in chhuahsantute hian a remchang laiah puan in kaihin an awm khawm hlawm a, a tlangpuiin khawthlang lam an pan a. Khawpui lian deuh daiah an inkulh ber a ni.
He ramah hian kum 17 zet chu tharum thawhna rapthlak tak tak a thleng tawh a, parliament inthlanpui pawh kum 3 ngawtin sawn hlat a ni.
UN chuan khawvel ram dangten December thla chawhma thlenga mi mtd 2.5 atang mtd 3 vel chu ei tur pea an tanpui lo a nih chuan thihna an tawk mai dawn niin a sawi.
Afghanistan-a UN humanitarian coordinator Toby Lanzer chuan, “Heng mite hian ni khatah chaw vawi khat chauh an ei a, chu pawh thingpui leh chhangthawm lêp khat bak an ei ngam tawh lo,” tiin ei tur an tlakchhamzia a sawi.
Lanzer chuan mi mtd 3 chuan emergency phase 4-ah an awm mek nia sawiin tampui mitthi an tih aia level khat chauhva sangah an awm tawh a. “Tuna rang taka tanpuina an dawng lo a nih chuan level 5-ah an kai thuai ang,” a ti bawk.
Tanpuitu pawl hrang hrang chuan wheat, mineral, vegetable oil leh ni tin mamawh zualpui chu thla hmasa khan mi 600,000 vel hnenah an lo pe tawh a. Hetiang zat vel bawk hnenah hian tun thla tawp hian pek leh an nih a beisei thu Lanzer chuan a sawi.