North Korea chuan kum nga chhunga a missile enchhin tawha chak ber a enchhin tuma thla a lakte nia a sawi chu a pho chhuak.
Vansang atanga thla lakah hian Korean peninsula leh a chhehvel a lang.
Pyongyang chuan Thawhtanni khan Hwasong-12 intermediate range ballistic missile (IRBM) a enchhin thu a sawi.
He missile hi a theihna sang bera kah chuan mel sang tam thlawk thei niin United States huam chhung, Guam pawh kap phak a ni.
Hetiang a enchhin hi khawvel ram hrang hrang ngaihven a hlawh hle.
Pyongyang hian thla liam ta chhung khan vawi sarih zet missile a enchhin a. US, South Korea, Japan leh ram dang tam takin an dem hle.
UN chuan North Korea hi ballistic leh nuclear ralthuam enchhin lo turin a ti a, hrekna na tak a kalpui bawk a; mahse, Asia khawchhak ram hian heng khapna hi a palzut nasa hle thung.
US thuneitute chuan Thawhtanni khan hetianga a chetna hian Pyongyang nena inbiak mai theihna dinhmun chu a tikhirh zual niin an sawi.
South Korea leh Japan chu Pathiannia ralthuam enchhin lo hre hmasa ber niin an anti-missile systems chuan a lo hmu.
Ralthuam hi IRBM thlawh dan pangngai ang vel nia sawiin km 800 chuang a thlawk a, van sang lamah km 2,000 vel zet thlawin Japan tuipuiah a tla niin an sawi a. Hetiang ralthuam hi a theihna sang ber anga hman chuan km 4,000 zet kap phak a ni.
North Korea pawhin Thawhtanni khan an sorkar chanchinbu kaltlangin ralthuam an enchhin thu hi an sawi a. KCNA chuan an missile enchhin chu an tum ang thlap a nih thu a tar lang a. Missile-a an dah thlalaknain a lak nia an sawi thlalakte pawh an pho chhuak bawk.
North Korea-in kumin chhunga missile lama beihpui a thlak chiam chhan hi hriat vek ni lo mah se tam takin ngaihdan an nei a. An ram hruaitu, Kim Jong-un-a khan kum thar thuchah a sawiah pawh hma an lana tur a sawi.
Kim-a hian nuclear chungchanga US nena inbiakna an kalpui, rei tak an chhunzawm tawh loh tihzawm leh a kar nan ni theia ngai an awm a. An chhehvel leh ram lian dangte pawh tihthaiha inbiak zui thuai nawr nan a hmang nia ngaih a ni.
Thenkhat erawh chuan an ramin missile leh thil siam lam (engineering)-a theihna an neih thar tihlan nan leh military command systems tha tak an nei a ni tih pho chhuah a tumnaah an ngaihsak bawk.
North Korea hre chianga zirtu (analyst), Ankit Panda erawh chuan Kim-a hian a thil neih a pho chhuah châkna emaw, a thiam thil thar a pho lan duhna lam ai mahin an missile system-te chuan an beisei angin hna a thawkin a dik tawk em tih a en duh niin a ngai.