Everton chuan Rafael Benitez an ban hnuah manager thar an nei ta a, Chelsea manager hlui Frank Lampard chu an lalut tih Sky Sports chuan a tarlang a, Everton pawh hian vawiin hian official announcement an neih a rinawm.
Everton hian Lampard hi kum hnih leh a chanve daih contract an ziahpui niin Sky Sports hian a tarlang a, Inrinni liamta khan Everton hian official-in Lampard hi an manager thar ni turin contract an zawrh a, hei hi English manager hian a pawm ta a ni.
Nikum January thla khan Chelsea-in Lampard hi an ban a, kum khat club enkawl nei lova a awm hnuah Lampard hian Everton a enkawl dawn a, Swansea leh Derby County manager hlui Paul Clement chu a assistant a ni ang.
Benitez an ban hnuah Everton hian manager an zawng nasa hle a, manager eng emaw zat interview an neihpui a, manager an neih hma atan Duncan Ferguson chu first team lo enkawl lailawk tur hian an ruat a ni.
Kum 43 mi Lampard hian kum 2016 khan inkhelh a chawlhsan a, kum 2018 khan management lam luhchilh tanin Derby a enkawl a, a kum lehah Chelsea hian an lalut a, Chelsea hi FA Cup final a thlenpui.
Lampard-a hna hi a awlsam dawn lova, tunah hian Everton hian khelh 20 atangin point 19 chiah an la hlawhchhuak a, 16-naah an awm mek a, an Premier League game hnuhnung pangaah chak nei lovin, vawi li ngawt an tlawm a, vawi khat an khingpuite an inhnehtawkpui a ni.