Aizawl: Mizo History Association leh Govt Aizawl College-a History department tangdunin nimin khan R Vanlawma chanchin zirhona buatsaih a ni.
Govt Aizawl College-a R Vanlawma chanchin zirhona ‘Symposium of R Vanlawma (1915-2006) to the people of Mizoram’ tih buatsaih hi Lalmuanpuia Punte, MLA chuan khuallian niin a hmanpui a. Khuallian chuan thu sawiin, R. Vanlawma chu Zoram hmangaihtu, Mizo hnahthlak zawng zawngte huang khata dah tlattu a nih thu a sawi a. Mizoram hnuk khawih thil a awm a nih chuan tel ve ngei tur leh a mawhphurtu zinga mi niin a inngai tlat thin a, Zoram chu fel hlelin a hre tlat thin tih a sawi.
Lalmuanpuia Punte chuan, “Pu R. Vanlawma hian thil ropui leh hlawk zawk chauh ni lo in, thil engpawh a tha leh dik chu a pawm a, a tha lo ni a a hriat chu a hnawl mai thin,” tiin a sawi bawk.
Prof Vanlalringa Bawitlung kaihhruai inkhawmah hian Mizo History Association President Prof Sangkima’n ‘Contribution of R. Vanlawma (1915-2006) to the people of Mizoram’ tih paper a buatsaih chu zir ho a ni a. Lalbiakzuala, Principal, Govt. Aizawl College leh Prof. JV Hluna, Vice President, Mizo History Association ten thu an sawi bawk.