Aizawl: February 19, 2024-a Vellore kal turte ken tur thil thawn tur zinga ruihhlo (heroin) a awm thu report an dawn chu Excise & Narcotics Department (END) chuan bawhzuiin, he thil kaihhnawiha mawhphurtua puh an man.
February 18, 2024 (Pathianni) zan dar 8 khan Anti-Narcotic Squad, Excise & Narcotics Department-a duty, Sub-Inspector chuan C. Laldinsanga, Chhinga Veng hnen atangin report a dawng a. C. Laldinsanga hian a tuk (19.2.2024) ah Vellore-ah a kal tur thu leh Vellore-a awm mekte thil chah an thawn tur a ken thlak sak tur chu a rinhlelh avanga a endik thu leh chu thil chu heroin a lo ni reng tih a hriat rualin END duty te hriattirin a man tir duh thu a thlen a ni.
Report chu bawhzuiin Excise & Narcotics Sub-Inspector chuan C. Laldinsanga in chu pan nghalin, heroin thawn an tum chu a man a, NDPS Act ’85 tlawhchhanin thubuai ziah luh nghal a ni.
He thubuai hi chhuiin END officer te chuan, heroin thawn tumtu phone number atangin social media (facebook leh Instagram) lama a account an zawng chhuak nghal a. Pawi khawihtua puh hi Lalrohlua (30), Durtlang Leitan Ramthar a ni tih hriat chhuah a ni a, amah pawh February 21, 2024 zan khan man niin, February 22, 2024 khan court-ah an thawn nghal.
END chuan tun laiin hetianga ruihhlo inthawn chungchangah hian fimkhur a ngaih thu leh, hre lova heng ruihhlo kawltu nih hi dana buaina nasa tak tawh theihna bakah inchinfel harsa tak a nih avangin, thil inthawn/inkensak thuah mi tin fimkhur lehzual theuh turin mipuite an hriattir a ni.