Mizoram Legislative Assembly thutkhawm neih meka zawhna leh chhanna hunah dan pangngai pela zawh belhna hun inpek thui a nih avangin house leader-in speaker chu a ruling kengkawh tha turin a ngen.
Nimina budget session chawhmaah zawhna leh chhanna hun hman a ni a, zawhna hmasa ber Starred question 21-na chu MNF member H.Lalzirliana’n Health Minister Lalrinpuii chhan turin a zawt a, a chhanna a pek hnuah Assembly Speaker Lalbiakzama’n zawh belhna hun hawngin, zawhna neitu bakah mi pasarih laiin zawhna an zawt a, hei hi dan pangngai pel a ni.
MNF MLA Zira’n zawh belhna a neih hnu hian speaker phalnain C.Ngunlianchunga, Lalrinsanga Ralte, Robert Romawia Royte, Rasik Mohan Chakma, R. Rohmingliana, H. Ginzalala leh K. Hrahmo ten zawhna an zawt a, Hrahmo thut fel hnu lawkah House Leader Lalduhoma chu ding chhuakin, speaker chu a ruling kengkawh tha turin a kam khat.
House leader Duhoma chuan speaker hnenah chuan nimin maiah ruling a siam thu te, question pakhatah supplementary – a zawttuin pakhat nei thei sela, mi dang pahnih nen pathum ni sela tih a nih thu a sawi a, “A tul viau chuan pahnih khatte chu i phalsak thei bawk. Hei question pakhatah khati zat khan Supplementary an zawt ta a, heti a nih chuan a chhanna nen darkar chanve aia tam question pakhatah kan hmang dawn tihna a ni a, i ruling kha kenkawh a va tha em ve aw, a dawt leha awm tan chance a awm dawn lo tlat,” a ti.
Hemi hnu hian speaker chuan zawhna dang la tawh loin house leader thu sawi anga zawh belhna lak tam a that loh thu a rawn sawi chhunzawm a, health minister chu zawhna chhang turin a sawm ta a ni.
Health minister Rinpuii hian member-te zawhna a chhan dawnah speaker rem tihna dilin a zawttu chu an zawhna neihte a zawt nawn a, hetiang hian member pathum chu zawhna a zawt nawn a, chhanna a pekah pawh a bah deuh nuai tih house chhunga awmte chuan an sawi.