German Bundesliga-a hmahruai mektu Bayer Leverkusen chuan inrinni zan khan an mikhual Mainz chu 2-1 in an hneh a, Bayern Munich record khumin record thar an siam. Leverkusen hian point 11 in hma an hruai fal hman a, inrinni zanah Bayern Munich in hnehna an chan ve leh vangin Leverkusen hmahruaina hi point 8 a ni leh thung.
Xabi Alonso hnuaia khel tha tak Bayern Leverkusen hian an mikhual Mainz lakah bul an tan tha hle a, inkhel tan atanga minute 3-na lekah Ganit Xhaka hmangin goal an thun nghal. Alonso team te hian Duhthusama thaa bul tanin, goal thun hma hle mah se goal an chhuah ve thuai tho thung. Goal an chhuah atanga minute li hnu lekah Mainz tan hian Dominik Kohr chuan minute 7-naah goal a thun a, an si phurh a sut.
Hma taka goal hnih a luh hnuin goal dang aluh belh thei lo vang vang. Ball chang tam leh hlauhawm zawka tang ngar ngar Leverkusen tan hian Robert Andrich chuan minute 68-naah hma an hruai nawn lehna goal a thun. Hnufual zawka an tan nawn leh hnuin Mainz an thochhuak zo tawh lo. An si phurh sut an tum ngawrh laiin Jessic Ngankam hnawhchhuah a ni a. Tlem zawk an ni hian Mainz chet a tiharsa leh zual. Hun tawp thlengin goal dang a luh belh thei tawh lova, Bayer Leverkusen chuan 2-1 n hnehna an chang ta a ni.
An mualah an chak leh tak vangin Bayer Leverkusen hi inelna hrang hrangah khelh 33 chhung tlawm nei lovin an kaltluang ta chiah. Bundesliga club zingah tlawm nei lova kal tluang rei ber record lo siam tawh Bayern Munich record vawi 32 chu Leverkusen hian an khum ta a, record thar duhawm tak an siam ta a ni. Record thar an siam zan hian Leverkusen hian point 11 in Bayern Munich an tlanpel hman a. Inrinni zana an chakna hmangin Bayern in Leverkusen nen an inkar an tizim leh thung.
Champion lai Bayern Munich hian inrinni zana an mikhual RB Leipzig chu Harry Kane goal thun hmangin an hneh. Bundesliga top-scorer ni mek Kane hian minute 56-naah hmahruaina goal a thun a. RB Leipzig tan Benjamin Sesko-a’n minute 70-naa goal a thun hnuin England captain Kane hian minute 90’+1-naah chakna goal a thun zui leh. Vawi thum an tlawm zawn hnua an chak leh tak vangin Bayern Munich hian hmahruaitu Leverkusen nen an inkar point 11 zeta zau hman chu point 8 ah an tlakhniam tir.