Inrinni zana English Premier League khelah team lian Manchester City leh Arsenal in hnehna an chan laiin Manchester United chu Old Trafford-ah Fulham hneh lovin an tlawm.
- City chakpuitu Foden
Champion lai Manchester City chu Vitality Stadium-ah lenglutin AFC Bournemouth an hmachhawn a. Mikhual an nihna mualah khel tha viau mah se Phil Foden goal thun hmangin hnehna an chang thei hram chauh. City tan hian khel tha tluang tak Phil Foden chuan minute 24-naah he inkhela goal awm chhun hi a thun. EPL top- scorer ni mek Erling Haaland chuan Bournemouth lakah hian goal thun theihna hun tha a hmu nual a, a hlah vek thung.
Bournemouth laka point thum an hmuh hmangin City hian hmahruaitu Liverpool nen an inkar an tizim a, khelh inzatah Liverpool ai hian point khatin an hniam zawk mek. City in Liverpool nen an inkar an tihzim lai hian Arsenal pawhin City nen an inkar an tizim ve leh bawk.
- Laipui a puak ring
EPL-ah bik tunhnaia khel tha tluang tak Arsenal chuan Emirates Stadium-ah Newcastle United an mikhual a, Gunners hian an mualah ngei ring takin Laipui vawi li ngawt an tipuak.
An muala khel tha tak Arsenal hian goal an thawkchhuak har lo. Minute 18-naah Newcastle player Sven Botman chuan an lamah a ti-goal a, Arsenal hmahruaina goal a thun sak. Botman-a’n an lama a tih luh hnu lawk hian Arsenal in goal dang an thun belh leh thuai. Arsenal a vul thar leh Kai Havertz chuan minute 24-naah goal a thun a, an hmahruaina a tizau.
Chawlhlawk hmaa goal hnih thun tawh Arsenal hi chawlhlawk hnu lamah an khel tha chhunzawm a, goal hnih dang an thun belh leh. Minute 65-naah Bukayo Saka chuan Havertz siamsak atangin an goal thumna a thun a. Saka goal thun atanga minute li hnu lekah Jakub Kiwior chuan an goal lina a thun belh zui leh zat bawk a, an hmahruaina a tizau.
Si li fai zeta an hnufual hnuin minute 84-naah Joe Willock chuan goal thunin an si phurh a sut then a. Willock goal thun hian an tlawm tur a chhanhim zo ta chuang lo. Champions League lamah rin loh takin tlawm bawk mah se Premier League-ah Arsenal an khel tha chhunzawm a, vawi ruk an chak zawn ta hial. An game hnuhnung pathumah goal an thun tawl tawk a, an elpui lian Liverpool leh Manchester City te aiin goal difference-ah Gunners hi an tha zawk ta hial a ni.
- United an tlawm
Team lian dang City leh Arsenal in hnehna an chan laiin Manchester United erawh chu Old Trafford-a an mikhual Fulham lakah tlawmin, an lo mualpho ve thung.
Old Trafford-ah United leh Fulham te an inhnehtawk viau a, goal pawh a lut lawk thei lo. Minute 65-naah Calvin Bassey chuan Fulham hmahruaina goal a thun nawlh a, mualneitu United a barakhaih. Si an phurh deuh reng hnuin Harry Maguire chuan minute 89-naah goal thunin United si phurh a sut.
Goal khat ve ve an thun hnuin United in hnehna chan ngei tumin tan an khawh zui viau a, hun tawp dawn hnaihah an vanduai hlauh thung. Hun tawp dawn tep minute 90+7-ah Alex Iwobi chuan Fulhman hmahruai nawn lehna goal a thun nawlh a. He goal hi team lian United lakah an chakpui a, Old Trafford-ah ngei point thum hlu bik hmuh nan an hmang.
An mualah ngei an tlawm leh tak vangin United tan top 4 huang luah phak a harsat phah leh zual dawn. United a chanvo 25% zet nei thar Sir Jim Ratcliffe chuan champions league khelh phak ngei a duh a. UCL-ah an inlan phak lo a nih chuan manager Erik ten Hag hian season tharah United a enkawl zui a rinawm tawh lo hial a ni.