Congress chuan Lok Sabha inthlanpui lo awm turah Samajwadi Party (SP) leh Aam Aadmi Party (AAP) te chu inremna siampui tawh mah se an buaina a la tawp mai hmel loh.
Eptu party lian ber hian state lian dang, West Bengal leh Maharashtra-ah thawhpui tur an la tifel thei lo va. Inthlanpui lah a hnai hle tawh a, INDIA tangrualten a huhovin BJP paih thlak tumin campaign rusum an la thlak tan thei lo zel.
Bengal-ah hian inremna an neih theih loh hnuah Congress hian Trinamool Congress chu bial inchan sempui turin dawr leh an tum mek.
Trinamool chief leh Bengal Chief Minister Mamata Banerjee chuan a hmaa an indawrna a hlawhchham hnuah anmahniin an chuh vek dawn tih a lo sawi tawh a. Adhir Ranjan Chowdhury-a kaihhruai state Congress unit chuan bial 10 chuanga din vea thawhho an duh a; mahse, Trinamool-in bial hnih chauh an kian phal si.
An indawr fel loh hnuah Chowdhury-a thinrim hian Trinamool chief chu ‘mahni tanghma ngai lutuk’ ti hialin a sawi zui.
Hemi hnuah hian Congress hruait lawkten Banerjee-i hi dawhkan kilpui leh an tum a, Rahul Gandhi-a chuan Chowdhury-a’n Trinamool chief a tih dan chu ‘engmah tak tak a ni lo’ a ti.
Banerjee-i hian Gandhi-a hova Bharat Jodo Nyay Yatra kalpui mek pawh Bengal an tlawh laiin a lo tawimawh duh lo tawh a, INDIA-a tel party-te inkarah hian inremna tak tak a awm lo niin a lang a. A huhova campaign huaihawi leh mipui thlen chu an la hlat rih niin a lang.
Maharashtra-ah pawh INDIA-a telten bial an la inchen sem fel thei lo va. Maha Vikas Aghadi an tih, Congress, Shiv Sena (Balasaheb Uddhav Thackeray) leh Sharad Pawar-a kaihhruai NCP te an indawr mek.
Congress hruaitu, Gandhi-a hian Thackeray-a a be tawh a. Congress hian Mumbai-a Lok Sabha bial ruk awma bial thum – Mumbai South Central, Mumbai North Central leh Mumbai North West-a din an duh a. Thackeray-a hian bial 18-a din a duh a, heng zingah hian Mumbai-a Mumbai South, Mumbai North West, Mumbai North East leh Mumbai South Central pawh a tel a. Hruaitu pahnihte hi darkar khat zet an inbia nia a sawi a ni.
Maharashtra-ah hian Congress hi an hruaitu hlun pathum – Milind Deora, Ashok Chavan leh Baba Siddique ten an chhuahsan bawk.
State Congress chief Nana Patole chuan tangho zingah inrem lohna a awm lo va, a huhovin MVA hian beiin tha takin an kal dawn niin a sawi a. “MVA-a tanghote hi bial insemah pawh harsatna a awm lo. Rorel lai, Mahayuti hi indawrna tha a awm loh avangin an buai zawk a. Maharashtra mipuite hian BJP leh an thawhpuite hi inthlan lo awm turah thil an zirtir ang,” a ti.
INDIA-in Maharashtra-a chona lian tak a neih mek chu party lian tak pahnih, Shiv Sena leh NCP te hi an inthen ve ve avangin an hruaitu, Thackeray leh Pawar te hian an hming leh symbol an chhawm thei lo hi a ni.
Party hming nghet sa leh symbol pangngai neih loh hi hmun kilkhawr leh ziak leh chhiar thiam awm lohnaah a pawi thei a. Hengho hian symbol enin an duh an thlan mai thin avangin keh darh zinga lehlam zawkin an nihna an chhawm zui zawk avangin vote tam tak chân thei an ni.
Bial inchan sem dan tur an tihfel hunah party pathum hian a huhova campaign an tan nghal a ngai dawn a. Hun an nei tlem tawh a, an hmanhmawh a ngai tawh hle.
Congress hian INDIA-a tel langsar pahnih, SP leh AAP te inremna a neihpui tawh thung a. Uttar Pradesh-ah Congress hian bial 80 awma bial 17-ah candidate an nei thei dawn a. Madhya Pradesh-ah Akhilesh Yadav-a kaihhruai party hi bial khatah an dintir ve thung ang.
AAP nen Grand Old Party hian Delhi, Gujarat, Haryana, Chandigarh leh Goa-ah bial an inchan sem fel tawh bawk a. Party pahnih hian Punjab-ah erawh a hran ve vein an chuh dawn thung.
AAP hruaitu, Delhi Chief Minister Arvind Kejriwal chuan Punjab-a an kal dan tur avang hian thil dangah buaina a awm lo niin a sawi a. Delhi-ah hian Congress hi bial sarih awma bial thumah an ding ang a. Gujarat-ah AAP hian bial 26 zinga pahnihah an chuh ang a. Haryana-ah Congress-in bial riat leh AAP-in bial khat an chuh ang a. Chandigarh-a bial khat awm leh Goa-a bial hnih chu Congress-in an chuh dawn bawk a ni.