Kan state legislative assembly session kal mekah mipui an phur hle niin a lang a. Kumdang zawng aiin khawlai lamah pawh session chungchang titi a tam hle. Mahse, la sawrkar ngai lo tih takah eptu lam tana sawi tur ti tam zawngin ruling lam an la che phelh deuh lek lek fo mai. An inzir chho ve zel turah ngai phawt ila.
Amaherawhchu house hotupa ber chief minister berin ram mipuiah mawh la ngam lova, thil thleng thenkhata midang puh a ching chuan sawi a hlawh deuh. Chief minister hian hmunphiah lei leh theih loh chungchanga a agent te thiam loh a chantir chuan mi tam tak ngaihdan a ti thlep a. A agent te dawrtu leh agreement ziahpuitu hi amah a ni a. Thil a kal fuh loh tâka agent te thiam loh a chantir rualin mipuite chu kan vanduai tlang ani a ti ringawt mai kha a dik lova. Ka thiam loh ani e ti turah mi tam tak chuan an ngai a. Thil dik lovah chief minister hian mawh mahni inphurh tir hi a hreh lutuk a ni an ti bawk. Hei bakah hian PC Vanlalruata, minister bill put luh the Mizoram Water Resourcea Management chungchangah chief minister hian bill chu cabinet ah sawiho a hriat loh thu a sawi a. An lo sawiho lo reng ni awm tak a ni. Mahse, minister in a rawn pulut tawh a. Mawhphurhna chu chief minister kutah a awm tho tho a. Chief minister hian hetiang a bill putluh chungchangah hian sawrkar lam officials te puh deuh titihin thu a sawi leh ta mai a. House a minister in a pulut anih chuan chief minister chu a mawhphurtu ani tawh tih a ngaihtuah lem lo niin a lang. Parliament house ah minister in bill an put luh hi prime minister in ka hre ve lo ti se a serious viau ang. Chutiang chu parliamemtary democracy inkhaichhawn dan chu a ni.
Kan chief minister hi hun rei tak chhung chu Mla niin house ah hian a lo thu tawh a. Sawrkar hotu ber chuan engkimah mawh a phurh thin zia chu hre awm tak anih laiin hetia bill a hriat ve loh thu a sawi ta mai leh officials lam a puh deuh ta mai hi a mawi lova. Officials lam tan ngaihthat awm lohna tam tak a awm thei a. CM lakah pawh inthlahrun awm tawh hle dawn a ni.
Eng resolution pawh hi house hian a passed emaw, a hnawl a ni emaw thu tawp hi CM kutah a awm a tih loh theih lohva. Kan CM kalta te khan engah pawh mawh an phur ngam thin. MNF ah pawh khan CM demna hlapui ber pakhat Kamrula tihah khan Pu Zorama khan mawh a la hmiah mai a. Amah chang ni lovin a party hruaitu tam takin Kamrula kha an hmang tangkai ve tih a hriat a. Mahse, CM khan mawh a la hmiah mai a ni. Chutiang chiah chuan Congress hunah khan Pu Lalthanhawla khan puhmawh tur dang a zawng khat hle. A mawha lokal ben per tuma CM in midang a puh kual hi a tha lova. Hun lokal leh turah chuan hotu nihna chelh zo takin mawhphurh la zat zat turin beisei tawh ang u.