RG, Stadium, Mualpuia khelh mek Khelo India University Games, men’s football semi-final chu thawhlehni khan khelh zawh a ni a, University of Calicut leh University of Kerala ten hnehna changin final an lut. Final hi vawiin chawhnu dar 2:00-ah khelh a ni ang.
Semi-final hmasa zawkah University of Calicut an khel tha viau a, an khingpui Mahatma Gandhi University, Kottayam chu si li faiin an sawp. University of Calicut tan hian Arjun chuan minute 19-naah hmahruaina goal a thun a. Hma taka goal an thun vangin inrintawkna sang zawk nen an inlan theih phah. Arju goal thun hnu hian Shamnad chuan minute 40-naah an goal hnihna a thun a, si hnih faia hmahruai chungin chawlhlawk an hmang.
Chawlhlawk hnu lamah UC an khel tha lehzual a, goal hnih an thun belh leh thuai. Second half tan atanga minute hnihna lekah Rahul Venu chuan an goal thumna thunin an hmahruaina a tizau a. An goal thumna an thun atanga minute li hnu lekah Arshad chuan an goal lina a thun zui leh zat bawk. Goal li an thun hnuin khel tha zui viau mah se goal dang an thun belh thei tawh bik lova, an khingpui ten an chhanlet theih bawk si loh vangin University of Calicut hian an goal li thunte hi final an luhpui ta a ni.
Semi-final hnuhnung zawkah champion lai Punjab University, Patiala leh an khelh hnuhnung bera goal sarih ngawt thun thei University of Kerala te an intum a. Hun pangngaiah 2-2 a an inhnehtawk hnuin penalty shoot-out-ah University of Kerala in 4-2 in hnehna an chang a, final an inhlangkai.
Kerala lakah Panjab in bul an tan tha a, mawi taka an khingpui tlarhnung an thiah hnuin Shivjot Singh chuan minute 21-naah awlsam takin a pet goal a, hmahruaina goal a thun. Goal chhuah hmasa zawkah tang mah se Kerala an buai lova, game thunun zawkah an tang let. An hun tha nei hloh bawk mah se Prathap chuan minute 45+1-ah goal thunin an si phurh a sut a. Chungnung zawk awm lovin chawlhlawk an hmang.
Chawlhlawk hnu lamah Kerala in bul an tan tha ve thung a. Jijo Jaison chuan minute 54-naah an hma an hruai letna goal a thun. Hnufual zawk an nih hnuin champion lai Punjab an insiamtha thuai a, Karandeep Singh chuan minute 60-naah goal thunin an si phurh a sut.
Inkhel hmuhnawm takah goal dang a luh belh theih loh vangin tie-break hmangin final lut tur chin fel a ni a. University of Kerala chuan 4-2 in hnehna an chang a, University of Calicut hmachhawn turin final an lut ta a ni.