Pakistan-a mipui pungkhawm thinrimte chuan hmeichhe pakhat, a kawra Arabic tawng inziak rang buai chu Quran-a mi chang lak chhuah emaw tiin an bawr chiam a; mahse, a him hlauh.
Police-in hmun himah an hruai hrang a, a hnuah ngaihdam a dil zui.
A kawrah hian ‘Halwa’ tih Arabic tawngin a inziak a, ‘chithlum’ tihna a ni.
Pakistan-ah hian an sakhua tihbawrhban chu thi tura tih theih a ni a. Mi tam tak chu Islam tibawrhbanga puh an ni thin a, an chungthu rel a nih hmain mipui thinrimin an chil hlum fo tawh thin.
Police-te chuan Pathianni chhun dar 1:30 vel (India-a chhun dar 1:40) velah mipui inhawr khawmin Punjab province khawpui, Lahore-a thingpui dawrah hmeichhia an hual tih thu an dawng a ni.
Police an thlen hian mi 300 vel zet an lo awm khawm niin Assistant Superintendent Syeda Shehrbano chuan a sawi.
Social media-a video darhah chuan hmeichhe pakhat hi hlauh hmel takin, dawr kil khatah a hmai hupa a awm lai a lang.
Video dangah chuan officer-ten an din hual tawh a, a kawr paihsak tura au thawm pawh a hriat theih a. Video thenkhatah chuan an sakhaw tibawrhbangtu chu a lu tan tura ti tura au pawh hriat tur a awm.
Social media-a darh dangah chuan Shehrbano-i’n thingpui dawr luhnaa dinga mipui chu zaidawh tura a ngen lai a lang bawk.
“Tute mahin kawra inziak kha a nihna an hre lo,” a ti a. “Hmeichhia kha kha hmun atanga lak chhuaha hmun hima awmtir kha kan tum ber a ni,” a ti.
Shehrbano-i hian hmeichhia hi chuan mipui hmaah engmah a sawi lo niin a sawi bawk.
Video dangah Shehrbano-i hian a banah kaiin, puan duma a lu tuamin a chhuahpui a. Police officer-ten mipuiin an khawih loh nan an veng tlat bawk tih a lang.
Shehrbano-i chuan Tehreek-e-Labaik Pakistan (TLP) party mite pawh pungkhawm zingah hian an tel niin a sawi.
Hmeichhia hi police station-ah lak a ni a, sakhaw thil zir mi tam tak chuan a kawra thil inziak chu Quran-a mi ni lovin Arabic tawng a nih thu an sawi hlawm.
Police hian zir mite chu an thil sawi record-a hmeichhia hi engmah bawhchhia a ni lo tih thehdarh turin an ngen nghal bawk.
“Hetiang thil tih hi ka tum lo, ka tihpalh a ni. Hetiang a thlen avang hian ngaihdam ka dil a, a thleng nawn tawh lo vang,” tiin hmeichhia chuan a sawi a. Muslim ve tho a ni a, an sakhaw tihbawrhban chu a duh ngai loh thil a ni tih a sawi bawk.
Thuneitute chuan amah hi Lahore-a bazar kal a ni a, khawpui hi a chhuahsan lehnghal tih an sawi.
Sakhaw thila prime minister advisor thin, Tahir Mahmood Ashrafi chuan hmeichhia hian ni lovin, pungkhawmte chuan ngaihdam an dil zawk tur a nih thu X-ah a tar lang.
Sakhaw tibawrhbangtute laka dan hi India-a British roreltute hun laia siam tawh kha niin Pakistan-ah hian kum 1980 chhova sipai sorkar khan a tikhauh lehzual.
Nikum August khan Pakistan khawchhak lam, Jaranwala-ah mi cheng pahnihin Quran an tichhia nia puh an nih avangin an khuaa biak in leh in tam tak tihchhiat a lo ni tawh.