Covid-19 chuan kum thum chhung a zawnin Chinese maktaduai telin an kum thar, Lunar New Year lawma an zin veivahna chu a tibuai ta.
Hripui a len hma kha chuan an kum tharah hian mi tluklehdingawn thum vel zet chu an ram chhung hmun hrang hrangah an zin thin a, khawvela tum khata mi an zin tam ber a ni thin.
Tun hnai kum thum chhung erawh hripui avangin an zin tur chu an thulh nasa hle.
Chinese thuneitute chuan Covid awm lohna (zero Covid strategy) an la kalpui mek zelah 2022 Winter Olympics tan hma chu khauh takin inkhuahkhirhna an la kalpui.
Lunar New Year an tih, China-a Spring Festival an tih bawk hi kuminah chuan February 1 a ni.
He hun hi China-a chengte chuan an nghahhlelh niin chhungkua awm darhte an inhmuh khawm hun a ni a. Khawpui lama hna thawk leh tulna dang avanga awm maktaduai telin chhungkuaa he hun hman tum hian an khaw lam an pan thin.
Chinese Ministry of Transportation chuan kuminah hian mi tluklehdingawn 1.18 vel an zin an ring.
Zin hi tam hle tho mah se hripui len hma nen chuan a inthlau hle a. Zin chhuak tam tak pawh hi dan zam zawm chung leh fimkhur takin, mi dang laka hri tidarhtu ni lo turin an zin chhuak hlawm.
Chinese-te hi sorkar chuan uluk takin a vil reng a, colour-coded system hmangin tute nge zin theia thei lo tih chhinchhiah an ni a. An phone-ah green health code a lan chuan Covid-19 len lohna hmunah an awm tihna a ni a, vantlang inkalpawhnaa an chuan hma leh kawngpuia an lo endik hmain he thil hi an dawng a nih loh chuan an che sawn thei lo.
China-ah hian thuneitute chuan hri leng hmehmih hmak (virus elimination policy) an kalpui a. Hei vang hian sawi lawk mang lova khawpui pum inendik thut te, inralrinna awm hman lova inkharkhip kalpui thut te pawh a awm thin a. Hetiang an kalpui hi an ram chhunga sawisel pawh an awm nual tawh a ni.
Winter Olympics chu Thawhlehni, Spring Festival-ah chuan hawn tura ruahman kha a ni a, hetih mek lai hian veng leh khua eng emaw zat chu hri leng dona kawngah hian inkhuahkhirhna khauh tak tak kalpui an la awm.
Hri leng leh inkhuahkhirhna kalpui hi a tuar ber chu mahni khaw hmun ni lova hna thawkte an ni a. Spring Festival hi kum khat chhunga an chenna ina hawa an chhungte nena hun an hmanho theih hun tawi te an neih chhun a ni.
“Hetianga zin veivah khap bur hi mahni khaw hmun lova hnathawk, chhun zan zawma tulte tan chuan a dik thei lo. Mahni in atanga hla taka an thawk a, an khuaah haw an chhungte nena ni rei lote, kum khat chhunga vawi khat chauh an neih an hman theih loh hi a dik thei dawn em ni?” tiin Chinese social media platform Weibo-ah pakhat chuan a tar lang nghe nghe.