Mizorama vawk pul hri, African Swine Fever (ASF) leng chu a reh fel tan tawh a, a reh thu hi February thla tawpah chuan official-a puan theih beisei a ni a; ram pawn atanga vawk leh vawksa lak luh khapna thupek chu hlih a ni.
The Zozam Times zawhna chhangin Vety department-a Joint Director Dr Lalhmingthanga chuan vawk pul hri lengin reh lam pan zel mah se official takin hri leng hi a reh tawh an la tih theih loh thu leh district hrang hranga vety department-a thawktuten ASF hri leng dinhmun an zirchian leh mek thu a sawi.
Dr Lalhmingthanga chuan, “District hrang hranga vety department-a thawktuten report an buatsaih mek a, February thla tawpah chuan official takin vawk pul hri leng hi a reh fel thu kan puang thei tawh ang,” a ti.
ASF hri leng chungchanga thupuangtu chuan vawk pul hri lenna hmuna puan khaw tam takah pawh hri kai thar leh vawk thi an awm tawh lo a, hemi avang hian inkhuahkhirhna an kalpuite pawh an hlip tan tih a sawi.
Myanmar atanga Mizorama rawn lut, raltlanten an rante an tlan luhpui thin thu sawiin, chungte chu uluk takin hri laka an fihlim leh fihlim loh an lo enfiah thin thu a sawi.
ASF leng thunun a nih tawh avangin ram pawn atanga vawk leh vawksa lak luh khapna, August 9, 2020-a tihchhuah tawh chu thu leh awm hma hlih a nih thu nimin khan Chief Secretary Dr Renu Sharma chuan a puang.
Vawk puitling/vawk note la lut turte chuan AH& Vety Department hnen atangin phalna an la hmasa ngei ngei tur a ni tih leh vawk/vawk notete chu hri awm lohna state leh thenawm rama mite chauh lak luh phal a ni a, an hrisel tha a ni tih tihchianna certificate leh CSF vaccination certificate an lak tur a ni.
Vety department chhinchhiah danin kumin January thla chhung khan ASF vangin Mizoramah vawk thi an awm tawh lo a ni.
March 21, 2021 atanga Mizoramah a leng tan tih hriat chhuah, vawk pul hri, ASF hi Mizoram district zawng zawnga khaw 272-ah lengin, vawk 29,824-in a thih phah tawh a, vawk pul hri darh zel tur venna atan vawk 10,381 suat a ni.