Power & Electricity Minister Pu F Rodingliana’n Mizoram khua zawng zawnga in tinah eng pek tuma hmalak mek a nih thu house a hrilh.
Nimin Assembly Session-ah member-te zawhna chhangin P&E minister chuan, khaw tina eng pe turin DPR siam a nih thu sawiin, chu chu central-ah a awm mek a, a chhuah theih chuan Mizoram khaw tina in tinah eng pek tum a nih thu a sawi.
Sorkar tharin hydel project siam tumin hma ala tih sawi bawkin, tunah hian Tuivai Hydroelectric Project, Lungleng khawbul Tlawng HEP leh Tuirini HEP-te chu thawh a nih theih nan hmalak mek a nih thu a sawi a, hetihlai hian hmalak tumna hmasa ber erawh chu sawi mai theih a ni rih lo tih a sawi a; hydel Project siam tura thil tul pawimawh hrang hrangte leh a thawhna tur sum leh pai hmuh hmasak apianga thawh nghal zel a nih tur thu a sawi.
F Rodingliana chuan hydel project siam tumin sorkar hmasa-in company engemawzat inremna a ziahpui a, kum 99 chhung a nih thute leh chu chu sorkar thar-in tha a tih loh avangin tihtawp a nih thu a sawi.
Khaw chhiat apianga Mizoram chhim lama current thim ziah chu abuaithlak hle tih sawiin, Hnahthial atranga 132 KV line buaipui mek a ni tihte, sum harsatna avangin chak taka hmalak theih a nih loh thute a sawi a. Chhimtuipui khua-a, MW 460 pechhuak thei tura NEEPCO nena inremna ziah chu tum anga a kal loh avangin inremna tihtawp a ni a, a aia te leh samkhai zawk siama hmalak tum mek niin a sawi bawk.