Pathianni zan khan English Premier League (EPL) ah inkhel ngaihven hlawh tak a awm a. Hmahruaitu nih inchuhin Liverpool leh Manchester City an inkhel. Anfield-a inkhel hmuhnawm takah chak zawk an awm theih loh vangin Liverpool leh City te hi Arsenal hnuaia an awm chhunzawm. Inkhel dangah Tottenham chuan 4-0 ngawtin Aston Villa an sawp ve thung.
- Liverpool 1-1 Manchester City
Anfield-ah table chung ber luah let leh thei turin mualneitu Liverpool in chak an mamawh a. Champion lai Manchester City hin Liverpool leh Arsenal chunga chuang turin chak an mamawh leh zual bawk. Tunhnaia EPL awptu pahnih Liverpool leh City te hi chak mamawh tak chungin an inhmachhawn a, inkhel hmuhnawm takah 1-1 in an inhnehtawk.
Hmahruaitu nih inchuha inkhel Liverpool leh City te inkhel hi tan phat atangin boruak a tang nghal at a, inkhel class sang an lantir dun. Inkhel hmuhnawm takah hian goal pawh a lut har lo. Kevin de Bruyne corner pet tha tak chu defender John Stones chuan hnai tak atangin a pet goal a, minute 23-naah hmahruaina goal a thun. John Stones-a’n goal a thun theih nan Liverpool tlarhnung pawt pengtu Nathan Ake finzia a lang chiang hle.
City in goal an thun hnuin inkhel a hmuhnawm zui viau a, Liverpool in goal thun theihna hun tha nei mah se an chhawr tangkai zo lo. City pawhin hlauhawm siam bawk mah se goal an thun belh thei bik lova, si khat faia hmahruai chungin City in chawlhlawk an hmang.
Chawlhlawk hnu lamah inkhel a hmuhnawm zual sauh a, goal hmuh tur a awm leh thuai. Second half tan tir teah City si nghal Ederson a chesual a, Darwin Nunez a tihtluk vangin penalty a chawi. Nunez hlawhchhuah penalty hi midfielder Alexis Mac Allister chuan harsatna tawk lovin a pet goal a, an si phurh a sut. Argentina midfielder Mac Allister hian Liverpool tan penalty vawi kua a pet goal zawn tawh a. Club leh ram tan penalty vawi 13 a pet tawhah vawi 12 zet a pet goal tawh bawk a, penalty vawi khat chiah a la thelh.
Liverpool in an si phurh an sut hnuin inkhel a hmuhnawm zui viau a, mikhual team City an hlauhawm zui viau. City tana khel tha tak Phil Foden chuan goal bar a tih per dawp a. Jeremy Doku pawhin goal post a pet per dawp bawk a, vanneihthlak takin Reds an him thei hram. Liverpool lam pawhin an chhun tha neih an chhawr tangkai thei lova, penalty beisei nawn mah se an hlawhtling ta bik lo bawk. Goal dang luh belh lovin inkhel a tawp a, chak mamawh Liverpool leh City te chu 1-1 in an hnehtawk ta a ni.
An muala chak zo lo Liverpool hian khelh 28 atangin point 64 an hmu a, Arsenal nen an point hmuh inzat bawk mah se goal difference-a an chhiat zawk vangin Reds hi pahnihnaah an awm. Champion lai City hian khelh 28 atangin point 63 an hmu ve thung a, pathumnaah an awm zui zel.
- Spurs an chak nuamsa
Pathianni zana inkhel dangah palina nih tuma intlansiak Aston Villa leh Tottenham Hotspurs te chu Villa Park-ah an inhmachhawn a. Mikhual team Tottenham in 4-0 ngawtin hnehna an chang a, palina nih inchuh boruak a nung thar leh zual.
Villa Park-a inkhelte hi an inhnehtawk viau a, goal pawh a lut lawt thei lo. Spurs hmahruaina hi minute 50-naah James Maddison thun a ni a. Hmahruaina goal an thun hnu hian Brennan Johnson chuan an goal hnihna a thun belh leh thuai, Villa player John McGinn hnawhchhuah a nih hnuin Tottenham tan Son Heung-Min leh Timo Werner ten goal an thun belh leh bawk a, awlsam takin Spurs an chak ta a ni.
An chunga awm mek Aston Villa an sawp vangin panganaa awm mek Tottenham in palina an hnaih leh zual a, Vialla nen hian an inkarah point hnih a tlazep mek a. Villa aiin Spurs hian khelh khatin an khel tlem zawk mek bawk. Heti a nih vang hian champions league khelh phak an beisei sang leh zual hle. Inrinni zan khan Manchester United an lo chak tawh bawk a, EPL-ah palina nih tuma inelna boruak a nung thar in, a ngaihnawm thar hle.