Mizoram a Basketball inelna lian leh ngaihhlut hlawh ber Mizoram Super League (MSL) season 9 chu March 13, Nilai zan khan khelh zawh a ni a. Champion lai Khatla TBL hneh nawn leh tu Zarkawt BCA chu champion thar an ni.
MSL final a intum thei tak, in champion chhawk deuh reng Zarkawt BCA leh Khatla TBL te hian thawhtan zan khan final thawhkhatna an khel a, Zarkawt BCA in point 95-80 in hnehna an chang tawh. Final thawhkhatnaa hnehna chang tawh BCA hian nilai zan khan TBL lakah point 89-77 in hnehna an chang leh a, an phu ang ngeiin champion thar an ni.
Final thawh hnihnaah hian inkhel a hmuhnawm ngha viau a, quarter khatnaah point an lut tam lo ve ve a, point hnihin Zarkawt BCA an chungnung thei hram. Quarter hnihnaah an inhnehtawk zui viau a, point 18 ve ve an thawkchhuak. Quarter hnihnaah inhnehtawk mah se point hniha hmahruai chungin BCA in chawlhlawk an hmang.
Chawlhlawk hnu lamah inkhel a hmuhnawm zui viau a, point pawh an thawkchhuak tam ta viau. Quarter thumnaah point an inluhchhawk zak zak hnuin hma hruai mektu BCA chu point ruk ngawtin an chungnung. Champion lai Khatla TBL in champion beiseina thar nei turin quarer hnuhnung berah chak ngei ngei an mamawh a, point kua talin an khingpuite an lehpelh a ngai. Chak mamawh viau mah se TBL hi point 4 in an hnufual zui leh a, champion nawn leh an beiseina mei mit nghal in, Zarkawt BCA lakah an trophy kawl mek an hloh zui ta a ni.
Khatla TBL hneh nawn leh a, an champion theih nan BCA tan Zonunsanga a khel tha viau a, point 23 a thawkchhuak. BCA tan hian an player thar Amritpal Singh pawh a khel tha zui leh viau a, final thawh hnihnaah point 21 a thawkchhuak. Khatla TBL tana point thawkchhuak hnem ber Joshua Aaron Keys chuan point 25 a thawkchhuak a, Vanlalthazuala’n point 18 a thawkchhuak ve bawk.
Tarlan tawh thin angin MSL 9-ah Zarkawt BCA an chungnung viau a, League round ah an chak vek a. Semi-final leh final-ah pawh vawi khatmah tlawm lovin season an khar. MSL 9-ah champion phu ber an ni a. An phu ang ngeiin chungnung takin an champion ta a a ni.
- MSL 9 thlirna
MSL 9-ah hian Dequandre Dupril Dentmond chuan khelh sarih atangin point 254 a thawkchhuak a, Game tinah point 36.3 thawkchhuak zel ang a ni a, chawhruala point thawkchhuak hnem ber a ni. Record en tur awm chinah MSL 9 point thawkchhuak hnem ber chu khelh riat atanga point 282 thawkchhuak Gregory Lee Heckstall a ni. Heckstall hian chawhrualin game tinah point 35.3 thawkchhuak zel ang a ni thung. Point thawkchhuak hnem zingah hian game 9 atanga point 201 thawkchhuak Lalropuia hming a lang tel.
Ball sawhlet dawn tam lamah Gregory Lee Heckstall chu ball sawhlet dawng ngun ber a ni a, ball sawhlet vawi 123 a dawng. Chawhrualin Heckstall-a’n ball sawhlet a dawn zat hi game tinah ball sawhlet vawi 15.4 a ni a. Tamas Amonte Bruce chuan game 6 atangin ball sawhlet vawi 112 a dawng a. Chawhrualin game tinah ball sawhlet vawi 18.7 dawng zel ang a ni.
MSL 9 khelh zawh takah hian Assist neih nghah lamah Mizo an langsar a, top 10 huangah mi pasarih lai an lang. Assist nei ngah ber chu Zonunsanga a ni a, ani hian game 10 atangin assist vawi 75 a nei a. Game tinah assist vawi 7.5 nei zel ang a ni. Zonunsanga hnuai chiahah hian Basketballer lar Lalrina Renthlei a awm. Lalrina Renthlei hian game 10 atangin assist vawi 64 a nei a, game tinah assist vawi 6.4 nei zel ang a ni.
Block neih ngah lamah pawh Mizo player an langsar a, a chungah Matthew Remtluanga Sailo a awm. Mathew hian game 9 atangin block vawi 26 a nei a. Game tinah block vawi 2.9 nei zel ang a ni.
MSL 9-ah hian mimal chawimawina paruk semchhuah a ni. Hnamdang (Foreign / Inter State) player zingah player tha berah Emmanuel Malou Zarkawt BCA thlan a ni a. Mizo (tualchhung) Zarkawt BCA an champion theih nana thawhhlawk tak R. Lalnunpuia thlan a ni. Joshua Aaron Keyes Khatla TBL chu Defensive player of the league (Foreign / Inter State)-ah thlan a ni a. Defensive player of the league (Home Soil)-ah Matthew Remtluanga Sailo, Zarkawt BCAthlan a ni ve thung. Lalsangliana, Champhai Basketball chuan Rookie of the league chawimawina a dawng a, Venghlui VR4 chu fair Play team an ni.