Mizorama hmeichhia te tana entrepreneurship lama hmalak pakhat, Academy for Women Entrepreneurs (AWE-4.0) State-Level Boot camp chu Thawhlehni khan Tourist Lodge, Chaltlang-ah neih zawh a ni.
AWE-4.0 hi United States sorkar hnuaia Department’s Bureau of Education & Cultural Affairs (ECA) hmalakna hnuaia ni hnih chhung buatsaih niin, North East India-ah chuan US Consulate General Kolkata hnuaiah he project hi kalpui a ni.
AWE 4.0 hi Mizoram leh Tripura tan bik a ruahmanna siam a ni a, Kolkata a Social Enterprise pakhat Contact Base in an buaipui a ni.
AWE 4.0 a tel duh tan QR code scan a, online a dilna theh luh a ni a, a diltu hi hmeichhia tur niin, diltu zingah mi 50 thlan an ni a. Heng mi 50 te hi April 1 leh 2, 2024 khan Chaltlang Tourist Lodge ah residential boot camp neih pui an ni a, nimin khan kharna hun hman a ni.
He hunah hian mentor leh mithiam hrang hrang ten sum dawnna kawngah training an pe a. Boot camp zawhah hian an business plan-ah te presentation an pe a, heta ti tha te chu Kolkata-ah boot camp neih pui leh an ni ang a, heng a senso hi organiser lam tum vek tur a ni.
Business plan tha pathum thlan te chu Rs nuai hnih pek a ni ang a. AWE a tel hrim hrimte hi entrepreneur tan chuan hlawkna tam tak a awm beisei a nih bakah, an mamawh ang zela mentoring pek te, buyer-seller meet leh online training hrang hrangahte an tel thei dawn bawk a ni.