Aizawl : Aam Aadmi Party (AAP) Mizoram chuan Mizoram Lok Sabha MP inthlan lo awm turah candidate an nei dawn lo va, Indian National Congress (INC) candidate Lalbiakzama an thawhpui tur thu leh a theih anga an puih tur thu an puang.
He thu hi nimin khan AAP Mizoram President Andrew Lalremkima’n Aizawl Press Club-ah thu thar thehdarhtute hmaah a puang a. “Kumin Lok Sabha inthlan lo awm turah candidate kan nei dawn lo va; mahse, central-a INDIA Alliance hnuaiah Congress-te nen thawhhona kan neih mek avang leh, Delhi lama kan hruaituten BJP paihthlak a, democracy tun din a nih beiseiin Pu Lalbiakzama, INC candidate chu lawm takin kan thawhpui dawn,” a ti.
Andrew Lalremkima chuan BJP sorkarna hnuaiah eptu party te rah behin an awm nasa tih sawiin, dan hrang hrang siam tharin an pu ber, Arvind Kejriwal bakah AAP minister pahnih jail-ah an khung mek a, mi dang pawh an vau reng tih a sawi a. Ram chhunga tha taka rorel aiin eptu party te beih hi mutmawh hnarmawh berah an nei nia a lan thu a sawi.
Mizoramah pawh BJP in MLA an neihna hmunte uluk taka mipuite’n an ngaihven a tul tih sawiin Andrew Lalremkima chuan, “Mizoram development ai chuan hnam hrang hang awmte hi min thendarh leh min inhuattir hi an duh ber niin a lang,” a ti.
AAP Mizoram President chuan, sum leh thuneihna hmangin thiam takin lamtang an siam mek tih sawiin, “North East India-ah Mizoramah chiah lalna an chan theih loh avangin theihtawp an chhuah mek a ni,” tia sawiin, India ram Prime Minister-in Hindu sakhua a vawrh lar dante leh a hmalakna zawng zawngte enin kristiante nen chuan eng tikawng mahin a inmil ngai dawn lo a ni tih hriat a tul tih a sawi bawk.