Lok Sabha MP inthlan lo awm tura MPCC star campaigner Zodintluanga Ralte, ex-Minister chuan a bial hlui Marpara area-a hmunphiah man ba, Rs. nuai 75 chuang la awm chu a rang thei ang bera pek a phut.
Thawhlehni atanga Lok Sabha MP inthlanpui lo awm tur atana INC tana campaign-a feh chhuak mek, Zodintluanga Ralte chuan nimin khan Marpara-a an party mipuite hmaah thu sawiin, a bial hlui Thorang bial chhunga Marpara khaw chheh vel khua te’n ZPM sorkar duhdan angin hmunphuah chingtute society an din tir a, King Industry (Falkland, Aizawl) hnenah hmunphiah an hralh tirna man, Rs nuai 54 chuang an la ba chu pawi a tih thu a sawi a. “Hetianga kuthnathawktu hmakhua ngai tak anga lan tum a, mipuite bumna leh tihbeidawnna lian tak, kalphung thar sorkar hmuh tur a awm ta fo mai chu a pawi takzet a ni,” a ti.
Zodintluanga Ralte chuan, ZPM sorkar duh dan anga hmunphiah chingtute society a din tirah hian, kuthnathawktute hian an rintawk avangin society ah hian Rs 100 chawiin an inziak lut tih a sawi a. King Industry hnuaiah hian Marpara chhehvel khua atangin, mi mal leh chhungkua bakah a hlawma pe te nen mi 269 te’n hmunphiah hi an pe tih a sawi.
Heng mi 269 bawr vel te hnen atanga hmunphiah leina mah hi King Industry hian Rs nuai 20 chauh a la pek thu leh, Rs nuai 54 chuang a la bat sak thu sawiin Zodintluanga Ralte chuan, “Cheng tam tak, kuthnathawktute sum sorkar hriatpui industry in a la bat sak hi a pawi hle a. Thingtlang mi te tan chuan Rs 100 pawh a hlut em em laia, Rs nuai 54 lai mai King Industry in an la batsak hi a pawi tak zet a ni,” a ti.
MPCC Star Campaigner chuan King Industry in hmunphiah ro, kg 1-ah Rs 75 chauha an lei theih laiin, nikum khan kuthnathawktyte hian kg 1-ah Rs 120 in an hralh thei thung tih a sawi a. Kumin hian kuthnathawktu hnenah hian King Industry hian kg 1-ah Rs 100 a lei tura an insawi laiin, Rs 75 chauhin an leisak thei hram niin kuthnathawktu an lo hrilh tih Zodintluanga Ralte hian a sawi.
Kalphung thar sorkar hian, kuthnathawktute hi an bana kaih mai duhtawk lo va, an thawh rah a reng thei ang bera an seng theihna turin ZPM sorkar leh King Industry te a phut tih Zodintluanga Ralte hian a sawi a ni.