Europe khawmuala football club te inelna ngaihhlut hlawh ber UEFA Champions 2023-24, quarter-final chu zanin (Thawhleh zan) dar 12:00 atangin khelh tan a ni dawn. Quarter-final hmasa pahnihah EPL club lian pahnih; Arsenal leh Manchester City te an inlan dawn. EPL hmahruaitu Arsenal hian an mualah German champion Bayern Munich mikhualin, fiahna hautak an hmachhawn dawn a. Champion lai City in UCL a club hlawhtling ber Real Madrid an hmachhawn ve thung ang.
- Arsenal vs Bayern
Champions League-ah Arsenal leh Bayern Munich te hi an intum thei hle a, vawi 12 an inhmachhawn tawh. Vawi 12 an inhmachhawn tawhah Arsenal hian vawi thum chauh hnehna an chang a, vawi hnih dang inhnehtawk in, Bayern Munich hian vawi sarih lai hnehna an chang tawh thung. An intum hnuhnung ber chu 2016-17 champions league last 16-ah a ni a. German club lian hian last 16 thawhkhatna leh thawh hnihnaah 5-1 in hnehna an chang ve ve a. Si belhkhawmah 10-2 ngawtin hnehna an chang. Bayern Munich laka Arsenal chak hnuhnun ber chu October 2015-ah a ni a. Champions League group Stage-ah si hnih faiin hnehna an chang. Allianz Arena-a group stage khelh a nihin Bayern hian 5-1 in hnehna an chang tho thung.
An hnuhma enin Arsenal tan Bayern Munich hi khingpui huphurhawm tak, Indona muala German ral lian tluk zeta hlauhawm an ni. Bayern an ngam loh thinna zawng zawng kha hun kal tawh, thawnthu hlui ang a ni thei thung. Bayern Munich hi season kal mekah an ropui bik viau lo. German Bundesliga lamah Bayer Leverkusen an el phak lova, point 16 laia an phak loh vangin an trophy kawl mek hloh fel tawh ang hiala ngaih an ni. Bundesliga-a an chet that loh rual hian tualchhung inelna dangah beisei an phak lo bawk. Champions League-ah hian an champion mial a nih loh chuan kut benga season khar thei dinhmunah an ding mek. Hetihlai hian Arsenal erawh chu Mikel Arteta hnuaiah an puitling ta viau a, EPL hmahruaitu an ni mek. Liverpool leh Manchester United chunga chuang mek an nih vangin Bayern Munich lakah inrintawkna sang tak nen an inlan ngei ang.
Bayern Munich an hneh mial a nih pawhin Arsenal tan kawng a harsa chhunzawm dawn. Semi-final-ah champion lai Manchester City leh UCL a club hlawhtling ber Real Madrid te inkhela chak zawk zawk an hmachhawn zui a ngai dawn.
- Bernabeu-ah City
Arsenal leh Bayern Munich ang thoin Manchester City leh Real Madrid te hi tunhnaiah an intum thei viau. Zanina an inkhel tur hi a zawna vawi thum an intumna tur a ni. 2021-22 season khan UCL semi-final-ah an intum a, mak tak maiin Real Madrid hian City an lehthal a, final lutin an champion zui nghe nghe. 2022-23 season khan semi-final-ah an inhmachhawn zui leh a, City hian si belhkhawmah 5-1 a hnehna changin final a lut a. City pawh hi an champion zui ve leh bawk. Season kal mek quarter-final-ah an intum zui leh dawn a, inkhel hmuhnawm an lantir zui leh ngei tura ngaih a ni.
Real Madrid leh Manchester City te hi vawi 10 an intum tawh a, an inhnehtawk hle. La Liga club lian Real Madrid chungnung hretin, vawi li an chak a. City vawi thum chakin, vawi thum dang an inhnehtawk. Champion lai City leh vawi 14 champion tawh Real Madrid te inkhela chak zawk zawk hi champion turin rin an kai zui hle ngei ang.
Champion lai Manchester City leh UCL a club hlawhtling ber, UCL a vawk lal len thin Real Madrid te hian Santiago Bernabeu-ah inkhel hmuhnawm an lantir ngei tura ngaih a ni. An leh luhna mualah an chak zo lo a nih pawhin an muala inlan leh tur an nih vangin City semi-final luh theihna hun tha an la nei zui thei tura ngaih a ni.