Zanin dar lai dar 12:30-ah Champions League quater-final khelh chhunzawm a ni dawn a. French Ligue 1 champion Paris St-Germain leh La Liga champion FC Barcelona an inhmachhawn dawn a. Atletico Madrid leh Borussia Dortmund an inhmachhawn dawn bawk.
French team lian PSG leh Catalan club lian FC Barcelona te hi an inhnehtawk thei hle a, vawi 12 an inhmachhawn tawhah chungnung zawk an awm lo. Vawi 12 an inhmachhawn tawhah hian vawi li ve ve hnehna an chang a, vawi li dang an inhnehtawk. An intum hnuhnung ber 2020-21 last 16-ah PSG hian si belhkhawmah 5-2 ngawtin hnehna an chang a, quarter-final an lut. Tun tum quarter-final a chak zawk zawk hi an pahnih inkarah chungnung zawk an ni zui nghal ang.
Ligue 1 champion PSG hian Lionel Messi, Neymar leh Kylian Mbappe te an kawl khawm vangin ngaihven an hlawh viau thin. Footballer ropui ber ang hiala ngaih Lionel Messi a chhuah hnuah Neymar a chhuak zui ve leh a, Mbappe la kawl bawk mah se an boruak a hniam duai. Ligue 1 lamah point 10 zetin sang fal mah se season tawp rualin an player pawimawh ber Mbappe chan thei dinhmunah an ding a, an tan hlim surh a har. Mbappe awm lai ngeiin an la champion ngai lohna UCL-ah champion an duh hle.
La Liga champion FC Barcelona hi tualchhung inelna lamah an chetha tawk lo. La Liga-ah an champion zo dawn lo niin a lang a, Copa del Rey lamah an tla tawh bawk. UCL hi trophy lian an lak theih hnaivai deuh a ni rih mai a. UCL-ah an champion thei a nih chuan Nou Camp chhuahsan tura ngaih Xavi-a’n a rilru a thlak phah hial mai thei. PSG leh Barcelona te inkhel tur hi goal thun thei pahnih Mbappe leh Robert Lewandoski te inelna a ni tel dawn a. Inkhel hmuhnawm tak kan beisei thei ang.
PSG leh Barcelona te inkhela chak zawk zawk hian semi-final-ah Atletico Madrid leh Borussia Dortmund te inkhela chak zawk zawk an hmachhawn zui dawn a, final luh theihna hun tha an nei.
Nilai zan vek hian La Liga club lian Atletico Madrid leh German club lian Borussia Dortmund te an inhmachhawn ve dawn bawk. La Liga club pathum ngawtin quarter-final an khel dawn a, La Liga club hlangin final khel thei dinhmunah an ding. Dormund hian Atletico Madrid hneh ngei an tum ang.
Champions League quarter-final thawh khatna hi April ni 9 leh ni 10 zanah khelh a ni dawn a. April ni 9 zan hian EPL club pahnih Arsenal leh City an inlan dawn. Arsenal hian Emirates Stadium-ah Bayern Munich an mikhual ang a. Champion lai Manchetser City chu Real Madrid hmachhawn turin Santiago Bernabeu-ah an lenglut ve thung ang. Semi-final thawh hnihna hi April ni 16 leh ni 17-ah khelh a ni ve thung ang. April 30 leh May 1 ah semi-final khelh a ni ang a. Final hi June 1 khian Wembley Stadium-ah khelh a ni ang.